कोशीका सहकारीमा २१ लाख ७८ हजार सदस्य, बचत ९२ अर्ब २५ करोड

विराटनगर । कोशी प्रदेशको झापा, मोरङ र सुनसरीका ठूला सहकारीहरुमा ५ लाख रुपैयाँसम्म बचत गर्नेहरुको ३३ अर्बभन्दा बढी बचत रहेकाे कोशी प्रदेश सहकारी रजिष्ट्रार तथा प्रशिक्षण कार्यालयले जनाएकाे छ ।

कोशी प्रदेश सहकारी रजिष्ट्रार तथा प्रशिक्षण कार्यालयले प्रदेश मातहतका सहकारी संघ- संस्थाहरुमा ५ लाखसम्म बचत गर्ने वचतकर्ताको जम्मा रकम र सदस्यको प्रारम्भिक विवरण तयार गर्दा पाँच लाखसम्मको बचत मात्रै ३३ अर्ब देखिएको हो ।

रजिष्ट्रार कार्यालयका अनुसार मोरङ झापा र सुनसरीका ११२ वटा सहकारीमा ३ लाखसम्म बचत गर्ने ८ लाख ८ हजार ४३९ बचतकर्ता छन् । ती बचतकर्ताको २८ अर्ब २० करोड ११ लाख ७ हजार ५८० रुपैयाँ सहकारीमा छ । ५ लाखसम्म बचत गर्ने १३ हजार ८७२ जना बचतकर्ता छन् । ती बचतकर्ताको ४ अर्ब ९० करोड ९५ लाख ३७ हजार ४१७ रुपैयाँ बचत छ ।

कोशी प्रदेश अन्तर्गत नियमन हुने सहकारी १ हजार ७८ वटा छन् भने स्थानीय सरकार अन्तर्गत ३ हजार ६५१ वटा सहकारी छन् । सहकारीमा १४ हजार २५२ जनाले प्रत्यक्ष रोजगारी पाएका छन् ।

प्रदेश सरकार अन्तर्गत रहेका १ हजार ७८ सहकारीमा मात्रै १२ लाख १५ हजार ३४४ सदस्यको १३ अर्ब २४ करोड २७ लाख ८ हजार रुपैयाँ शेयरपूँजी र वचतकर्ताको ६५ अर्ब ५८ करोड ८७ लाख ७५ हजार रुपैयाँ बचत छ ।

ती सहकारीहरुको ऋण लगानी ८१ अर्ब १३ करोड ९ लाख ५४ हजार छ । सम्पत्ती दायित्व १ खर्ब ३ अर्ब ९ करोड २१ लाख ५४ हजार रहेको छ ।

कोशी प्रदेशमा भएका सबै सहकारीमा २१ लाख ७८ हजार ५०३ शेयर सदस्य छन् । ति सहकारीकाे  शेयर पूँजी २१ अर्ब ५२ करोड ९२ लाख ८२ हजार ८२२ रुपैयाँ छ ।

प्रदेशका सहकारीमा सर्वसाधारणकाे कूल बचत ९२ अर्ब २५ करोड ५९ लाख ७९ हजार ३२८ छ । कर्जा प्रवाह १ खर्ब १३ अर्ब ११ करोड १८ लाख ९८ हजार ७१३ छ ।

सहकारीकाे जम्मा सम्पत्ती र दायित्व १ खर्ब ४५ अर्ब १७ करोड ३७ लाख ४१ हजार ४८ रुपैयाँ रहेको छ ।