पेट्रोल खन्याएर श्रीमतीको हत्या

उदयपुर । उदयपुरमा आफ्नै पतिले पेट्रोल खन्याएर शरीरमा आगो लगाएकी एक जना महिलाको मृत्यु भएको छ ।

बेलका नगरपालिका–८ का पति ४८ वर्षीय दानबहादुर राईले पेट्रोल खन्याएर आगो लगाउँदा ४० वर्षीया श्रीमती (पत्नी) पूर्णकुमारी राईको मृत्यु भएको हो ।

प्रहरीका अनुसार पूर्णकुमारीलाई घरयासी विवादका क्रममा दानबहादुरले असोज २२ गते पेट्रोल खन्याएर आगो लगाएका थिए ।

आगोले शरीरका विभिन्न भाग जलेको थियो । गम्भीर अवस्थाकी पूर्णकुमारीको धरानस्थित बीपी कोइराला स्वास्थ्य विज्ञान प्रतिष्ठानमा उपचार भइरहेको थियो ।

उपचारकै क्रममा सोमबार मृत्यु भएको जिल्ला प्रहरी कार्यालय उदयपुरका इन्स्पेक्टर सुमन बानियाले बताए ।

पत्नीको शरीरमा पेट्रोल खन्याएर आगो लगाउने दानबहादुरलाई प्रहरीले नियन्त्रणमा लिएको छ । उनीविरुद्ध ज्यान सम्बन्धी कसुरमा मुद्दा चलाउन अदालतबाट म्याद थप गरेर अनुसन्धानको बाँकी प्रक्रिया अघि बढाइएको प्रहरीले जनाएको छ ।