कास्की अदालतमा रवि लामिछाने

विराटनगर । सहकारीको रकम अपचलनको आरोपमा पक्राउ परेका पूर्वगृहमन्त्री तथा राष्ट्रिय स्वतन्त्र पार्टी (रास्वपा)का सभापति रवि लामिछानेलाई प्रहरीले जिल्ला अदालत कास्कीमा उपस्थित गराएको छ ।

शुक्रबार काठमाडौंबाट पक्राउ परेका रविलाई सोही दिन पोखरा लगिएको थियो । शनिबार अदालत बन्द भएका कारण प्रहरीले आज अदालतमा उपस्थित गराएको हो ।

शुक्रबार नै प्रहरीले सहकारीको बचत अपचलन र संगठित अपराधमा अनुसन्धानका लागि रविविरुद्ध पक्राउ पुँर्जी लिएको थियो ।

रविलाई पक्राउको विरोधमा उनका समर्थकले पोखरामा प्रदर्शन गरिरहेका छन् ।

रास्वपाले प्रदर्शन गर्ने घोषणा गरेपछि जिल्ला प्रशासन कार्यालय कास्कीले जिल्ला अदालत, सहिदचोक आसपास प्रशासनले निषेधित क्षेत्र तोकेको छ ।

निषेधित क्षेत्रमा रास्वपाका कार्यकर्ताले प्रदर्शन गरिरहेका छन् । निषेधित क्षेत्रबाट रास्वपा नेता कार्यकर्तालाई हटाउन ठूलो मात्रामा प्रहरी परिचालन गरिएको छ ।