हमासका प्रमुख मारिएपछि इजरायलमा खुसियाली, युद्ध विराम हुने अमेरिकाको अपेक्षा

विराटनगर । इजरायलको आक्रमणमा हमासका प्रमुख याह्या सिनवार मारिएको पुष्टि भएको छ ।

फिंगरप्रिन्ट्स् र डीएनए परीक्षणबाट सिनवार मारिएको पुष्टि भएको इजरायल डिफेन्स फोर्सले पुष्टि गरेकाे हाे । यो घटनापछि इजरायल र अमेरिकाले खुसी व्यक्त गरेका छन् । अमेरिकाले युद्ध विराम हुने अपेक्षा गरेको छ ।

इजरायल डिफेन्स फोर्सले विज्ञप्ति जारी गर्दै सिनवारलाई गाजाको दक्षिणी भागमा करिब एक वर्ष लामो खोजपछि बुधबार मारिएको जनाएको बीबीसीले उल्लेख गरेको छ ।

सिनवार गतवर्ष अक्टोबर ७ मा इजरायली भूमिभित्र भएको हमासको आक्रमणको प्रमुख योजनाकार भएको इजरायली आरोप छ ।

सिनवार पछिल्लो दशकयता हमासको शीर्षस्थ नेतृत्वमा रहेर काम गर्दै आएका थिए । इजरायलसँगको द्वन्द्वका क्रममा गत जुलाईमा हमासका तत्कालीन प्रमुख इस्माइल हानिया मारिएपछि हमासले सिनवारलाई समूहको प्रमुख नेताको रुपमा चयन गरेको थियो ।

सन् २०२३ अक्टोबर ७ देखि हमास इजरायली सेनासँग लड्दै आएको छ । इजरायली विदेशमन्त्री इजरायल काट्जले इजरायली सेनाको आक्रमणमा परी सिनवार मारिएको पुष्टि गरे ।

हमासका नेता सिनवार मारिएपछि इजरायलमा उल्लास छाएको छ । सडकमा इजरायली नागरिकले खुसीव्यक्त गरेका हुन् ।

हमासका प्रमुख याह्या सिनवारको मृत्युपछि अमेरिकाले पनि खुसी व्यक्त गरेको छ । यो घटनापछि इजरायल र विश्वका लागि राम्रो दिन भएको टिप्पणी गरेको छ । युद्धविराम गरेर नयाँ राजनीतिक सम्बन्धको सुरुवातको अवसर समेत भनेको छ । राष्ट्रपति जो बाइडेनले सिनवारको मृत्युको दिनलाई इजरायल, अमेरिका र विश्वका लागि राम्रो दिन भएको बताए ।
एजेन्सीकाे सहयाेगमा