विश्वप्रसिद्ध उद्योगपति टाटाकाे निधन

विराटनगर । भारतका प्रसिद्ध उद्योगपति रतन टाटाको निधन भएको छ । ८६ वर्षको उमेरमा बुधबार राति मुम्बईमा उनको निधन भएको हो ।

टाटा सन्सका अध्यक्ष एन‍. चन्द्रशेखरनले विज्ञप्ति जारी गरी रतन टाटाको निधन भएको जानकारी दिए ।

टाटाको निधनमा भारतीय राष्ट्रपति, प्रधानमन्त्री लगायतले शोक व्यक्त गरेका छन् ।

राष्ट्रपति द्रौपदी मुर्मुले एक्समा लेखेकी छन्– रतन टाटाको निधनबाट भारतले यस्तो आइकनलाई गुमायो जसले पुँजी वृद्धिलाई देशको निर्माणसँग र उत्कृष्टतालाई नैतिकतासँग जोड्यो ।’

प्रधानमन्त्री नरेन्द्र मोदीले पनि रतन टाटालाई एक भिजिनरी बिजनेस लिडर र एक असाधारण व्यक्तिको रुपमा सम्झिएका छन् ।

रतन टाटाको जन्म २८ डिसेम्बर १९३७ मा भएको थियो । उनलाई भारत सरकारले प्रतिष्ठित पद्म विभूषणबाट सम्मानसमेत गरेको थियो ।