खानेपानी मन्त्रीलाई हर्क सम्पाङको पत्र : ‘ल्याण्डफिल्ड साइट बनाउन खत्रा लाग्नु पर्याे’

विराटनगर । धरान उपमहानगरपालिकाका मेयर हर्क सम्पाङले फोहोरमैला व्यवस्थापन गर्ने व्यवस्थित सेनेटरी ल्याण्डफिल्ड साइट निर्माणका बजेट माग गर्दै खानेपानी मन्त्रालयलाई पत्र पठाएका छन् ।

व्यवस्थित सेनेटरी ल्याण्डफिल्ड साइट नहुँदा समस्या भएको भन्दै उनले ल्याण्डफिल्ड साइट बनाउने योजनाका लागि पुग्दो पैसा हाल्दिनु पर्‍यो’ भन्दै पत्र पठाएका हुन् । उनले लेखेको पत्रमा ल्याण्डफिल्ड साइट निर्माणका लागि ‘खत्रा लाग्नु पर्याे’ भन्दै भोलीचालीको शब्द प्रयोग गरिएको छ ।

‘धरानको व्यवस्थित सेनेटरी ल्याण्डफिल्ड साइट बनाउन अत्यावश्यक भएकोले योजनाको लागि पुग्दो पैसा हाल्दिनु पर्‍यो । फोहोर जंगलमा फान्दा व्यबस्थित भएन भनेर फोटो खिच्ने र राजनीति गर्नेहरुको संख्या दिनानुदिन बढिरहेको छ। साथै फोहोर बगेर तल्लो भेगमा पुग्ने गरेको छ,’ उनले पत्र लेख्दै भनेका छन् ,‘ वर्षेनी सुख्खा याममा फोहोरमा आगो लागेर डढेलो लागेर बिजोग हुन्छ । तार घेरा लाउन लाको बनका मान्छेहरु आएर डोजरले भत्काइदिए । यो विषयमा पत्र पठाको पनि धेरै भयो । अध्ययन गर्ने भन्छन् । कति लामो अध्ययन हो ? कति वर्षे कोर्ष हो ? जनतालाई देशलाई सेवा, सुविधा तत्काल चाहिएको छ । हाम्रो सरकार र कानूनलाई प्रक्रिया माचि प्रकिया माथि प्रक्रिया अध्ययनै अध्ययन मात्रै चाहिएको छ। लौन सरकार खत्रा लाग्नु पर्याे ।’