आज शुक्ल पञ्चमी, स्कन्दमाताकाे पूजा

विराटनगर । दसैंको पाँचाै दिन आज स्कन्दमाताको विधिपूर्वक पूजा आराधना गरिँदै छ । दसैं घर वा पूजा कोठामा नौ दुर्गामध्येकी पाँचौ माता स्कन्दमाताको पूजा गरिँदै छ ।

आज शुक्ल  पञ्चमी पनि हो, आजकै दिनदेखि नवमीसम्म दुर्गा देवीको विशेष आराधना गर्छन् । नौ दिनसम्म पूजा आराधना गरेको प्रसाद विजयादशमीदेखि कोजाग्रत पूर्णिमाका दिनसम्म लगाइन्छ ।

छान्दोग्य श्रुतीका अनुसार भगवतीको शक्तिबाट उत्पन्न भएकाले सनत्कुमारको नाम स्कन्द रहन गएको हो । 

नवरात्रका नौं दिन घटस्थापना गरिएको स्थलमा दुर्गा सप्तशती (चण्डी), श्रीमद्देवी भागवतलगायत देवी स्तोत्र पाठसमेत गरिन्छ ।

नवरात्रका अवसरमा देवीको आराधना गरी पूजा गरेमा शक्ति, ऐश्वर्य र विद्या प्राप्त हुने धार्मिक विश्वास छ ।