आज दसैंकाे पाँचौ दिन

विराटनगर । आज (सोमबार) बडादसैंको पाँचौं दिन हो । आज देवीको पाँचौं रुप स्कन्दमाताको पूजाआजा गर्ने परम्परा छ ।

भूमिमा रहेको वीर्यबीज शक्तिबाट स्कन्दलाई जन्म दिएकी हुनाले माता पार्वतीको यो रुपलाई स्कन्दमाता भनेर पूजा गर्ने गरिन्छ । शिवको पसिनाबाट वीर्यबीज बनेको र त्यसैबाट कार्तिकेय वा स्कन्दको जन्म भएकाले स्कन्दमातालाई कर्म र परिश्रमको प्रतीक मानिन्छ ।

स्कन्दमाताको वदन वर्ण पहेँलो चित्रण गरिएको छ । यी देवी मानस गद्दीमा बसेकी र हातमा कमलको फूल धारण गरेकी छन् । यस्ती देवीको भक्ति गर्नाले सन्तान सुख पाइनुका साथै उर्वराले धर्ती सुसम्पन्न हुने मान्यता छ ।

नवरात्रका अन्य दिनझैं देवी भक्तिका लागि आज पनि भक्तजनहरु मुलुकका विभिन्न शक्तिपीठ तथा देवी मन्दिरमा पूजापाठ गर्छन् ।