मोरङमा क्रसरले बनाएकाे खाल्डोमा डुबेर दाजुभाइको मृत्यु

विराटनगर । क्रसरले बनाएको खाल्डोमा डुबेर मोरङमा दाजुभाइको मृत्यु भएको छ ।

मोरङका प्रहरी उपरीक्षक नवराज कार्कीका अनुसार केराबारी गाउँपालिका–८ मा रहेको कृष्ण क्रसरले बनाएको खाल्डोमा डुबेर सोही स्थानका तोयानाथ चौलागाईंका छोरा ६ वर्षीय रामचरण र १० वर्षीय भूपेनको मृत्यु भएको हो ।

क्रसर उद्योगको परिसरबाट केहीदिनअघि ढुंगागिटी निकाल्दा खाल्डो बनेको थियो । सो खाल्डो नपुर्दा दुई बालकको मृत्यु भएको स्थानीयले बताएका छन् ।

 प्रहरीका अनुसार रामचरणको शव साढे ३ बजे पोखरीमा फेला परेको थियो । उनका दाजु भूपेन बेपत्ता थिए, खाल्डोमा खोजी गर्ने क्रममा साँझ भूपेनको पनि शव फेला परेको थियो ।

सुरुमा फेला परेको शवलाई प्रहरीले पोष्टमार्टमका लागि विपि कोइराला स्वास्थ्य विज्ञान प्रतिष्ठान धरान पठाएको छ । पछि खोजी गर्ने क्रममा फेला परेको दाजुको शव भने स्थानीयले अवरोध गरेका थिए । स्थानीय प्रशासनले घटनाको छानविन गर्ने बताएपछि खाल्डोबाट शव निकाल्न स्थानीय सहमत भएका थिए ।

मोरङका प्रहरी उपरीक्षक कार्कीका अनुसार पौडी खेल्ने क्रममा बालकको मृत्यु भएजस्तो देखिन्छ । ‘उनीहरु कतिबेला खाल्डोमा पसे भन्ने खुलेको छैन, तर पौडी खेल्न गएजस्तो देखिन्छ,’ उनले भने,‘ थप अनुसन्धान भइरहेको छ ।’

उनका अनुसार बालकका बुबा सोही क्रसरमा मजदुरी गर्छन् ।