झ्याप्लेखोला पहिरो : तीन गाडी भित्र भेटियो ३० यात्रुको शव

काठमाडौँ ।  माेफसल र काठमाडौँ जोड्ने पृथ्वी राजमार्गको धादिङको झ्याप्लेखोलामा खण्डमा पहिरोमा परेको ३ वटा गाडीमा ३० जनाको शव फेला परेको छ । प्रहरीले पहिराे पन्छाउने प्रयास गरिररहेकाे छ । यो संख्या अझै बढ्न सक्ने प्रहरीले बताएको छ ।

सशस्त्र प्रहरी बल, नेपालका अनुसार उक्त पहिरोमा एउटा बस र दुइटा माइक्रोबस पुरिएको अवस्थामा भेटिएको थियो ।

शनिबार दुई वटा गाडी भेटिएको थियो । आइतबार बिहान चितवनबाट काठमाडौंका लागि आएको माइक्रोबस पनि फेला परेको छ । बस भित्रबाट १३ जनाको शव निकालिएको छ ।

सशस्त्र प्रहरी बल, नेपालका सह–प्रवक्ता शैलेन्द्र थापाका अनुसार चितवनबाट काठमाडौं आउँदै गरेको बा ३ ज १३४५ नम्बरको माइक्रो बस पहिरोमा पुरिएको हो । उक्त माइक्रो बसबाट ४ महिला र ९ पुरुषको शव निकालिएको छ । पहिरोमा अन्य गाडीहरू पनि पुरिएको आशंकामा खोजी कार्य जारी रहेको उनले बताए ।

पहिरोमा गोरखाबाट काठमाडौं आउँदै गरेको ना ४ ख २२७० नम्बरको यात्रुवाहक बस र बुटवलबाट काठमाडौं आइरहेको लु १ ज ४५७८ नम्बरको माइक्रोबस पनि परेको छ । बुटवलबाट आउँदै गरेको बसमा १४ जना र गोरखाबाट आउदै गरेको बसबाट तीन जनाको शव निकालिएको छ ।