बाढीको रेकर्ड बनाएर घट्न थाल्यो कोशी 

विराटनगर । सप्तकोशी नदीमा आएको बाढी घट्न थालेको छ । ५६ वर्षयता कै उच्च बढी आएको कोशीको पानी आइतबार बिहानबाट घट्न थालेको हो ।

आइतबार बिहान कोशी ब्यारेजमा बाढीको बहाव ६ लाख ६१ हजार ०५ क्युसेक मापन भएको थियो । त्यसपछि निरन्तर घट्न थालेको हो । कोशी ब्यारेज कन्ट्रोल रुमका अनुसार साढे ११ बजे ५ लाख ८२ हजार क्युसेक मापन भएको छ ।

कोशीमा मापन भएको ६ लाख ६१ हजार क्युसेक बहाव १९६८ अक्टोबरयताको धेरै हो । १९६८ अक्टोबर ५ मा कोशीमा ७ लाख ८८ हजार २ सय क्युसेक बहाव मापन भएको थियो ।त्यसपछि आज बिहान मापन भएको हो ।

उच्च बहावका कारण ४८ घण्टायता कोशी ब्यारेजका ५६ वटै ढोका खोलिएका छन् । ब्यारेजको पुलबाट अत्यावश्यक सवारी साधनबाहेक बाहेकलाई आवतजावतमा रोक लगाइएको छ ।

कोशी नदीमा लेदोसहितको बाढी अत्याधिक छ । सन् १९६२ मा बनेको कोशी ब्यारेजमा ९ लाख ५० हजार क्युसेक पानीको बहाव थेग्नसक्ने क्षमता छ । तर यो बिचमा ब्यारेजमाथिको भाग बालुवाले पुरिएका कारण सो क्षमतामा बहाव थेग्न सक्ने अवस्था छैन ।