कोशी ब्यारेजबाट नदीमा खस्यो बस

विराटनगर । कोशी ब्यारेजबाट नदीमा खसेको बसका सबै यात्रुको उद्दार भएको छ ।

विराटनगरबाट यात्रु लिएर उदयपुरको गाईघाटतर्फ जाँदै गरेको को १ ख ४६०१ नम्बरको बस सुनसरी र सप्तरीको सिमानामा रहेको ३५ नम्बर ढोकाबाट नदीमा खसेको थियो । बस खसेको स्थान सप्तरीमा पर्छ । सप्तरी प्रहरीका प्रवक्ता डीएसपी ढुण्डीराज न्यौपानेका अनुसार बसका सबै यात्रुकाे उद्दार गरिएकाे छ । प्रहरी सवारी चालकलाई पनि नियन्त्रणमा लिएकाे छ ।

सप्तरीको हनुमाननगर–कंकालिनी नगरपालिका–१ स्थित कोशी ब्यारेजको पुलबाट बस आफैं अनियन्त्रित भएर साँझ ६ः१० बजेतिर नदीमा खसेको थियो । सुनसरी प्रहरी प्रमुख विपिन रेग्मीका अनुसार कोशी ब्यारेजको पुलबाट खसेको बसका २० जना यात्रुको उद्धार गरी उपचारका लागि पठाइएको छ ।