सडक किनारका रुख नकाट्न रतुवामाईलाई अदालतको आदेश

विराटनगर । उच्च अदालत विराटनगरले मोरङको रतुवामाई नगरपालिकालाई रुख काट्न रोक लगाएको छ ।

सडक विस्तारको नाममा रुख नकाट्न रतुवामाई नगरपालिकाको नाममा उच्च अदालतले अल्पकालीन अन्तरिम आदेश जारी गरेको हो ।

रतुवामाई नगरपालिकाले सडक किनारमा रहेका रुख भदौ ३० गतेबाट काट्न सुरु गर्ने भन्दै भदौ २८ गते सूचना जारी गरेको थियो । पालिकाले जारी गरेको सूचना रोक्न र बोटविरुवाको संरक्षणको माग गर्दै अधिवक्ताद्वय विनोदमणि भट्टराई र लबन न्यौपानेले रिट दायर गरेका थिए ।

सोही रिटमाथि प्रारम्भिक सुनुवाइ गर्दै न्यायाधीश केशवप्रसाद बास्तोलाको इजलासले रुख नकाट्न नगरपालिकाको नाममा मंगलबार अल्पकालीन अन्तरिम आदेश जारी गरेको हो ।

रिट निवेदकले माग गरेको अन्तरिम आदेशको सन्दर्भमा छलफल गर्न दुवै पक्षलाई असोज १४ गते उपस्थित हुन पनि उच्च अदालतले आदेश दिएको छ ।