कोशी सरकारको न्यूनतम साझा कार्यक्रम बनाउन कार्यदल गठन

विराटनगर । एमाले नेतृत्वको कोशी प्रदेश सरकारको न्यूनतम साझा कार्यक्रम बनाउन कार्यदल गठन भएको छ ।

मुख्यमन्त्री तथा मन्त्रिपरिषद्को कार्यालयमा बसेको सत्तापक्षको संयुक्त संसदीय दलको बैठकले न्यूनतम साझा कार्यक्रम तय गर्न कार्यदल गठन गरेको हो ।

६ सदस्यीय कार्यदलमा एमालेबाट आर्थिक मामिला तथा योजनामन्त्री रामबहादुर राना, एमाले प्रमुख सचेतक रेवतीरमण भण्डारी र प्रदेश सांसद तिलचन पाठक छन् । कांग्रेसबाट भौतिक पूर्वाधार विकास मन्त्री भुपेन्द्र राई र संसदीय दलका उपनेता हिमाल कार्की र प्रमुख सचेतक गोपाल तामाङ छन् ।

कार्यदललाई कोशी प्रदेश सरकारको न्यूनतम साझा कार्यक्रम तय गर्न असोज २३ गतेसम्मको समय दिइएको छ । एमाले कोशी प्रदेशका प्रमुख सचेतक रेवतीरमण भण्डारीका अनुसार समितिले तयार गरेको न्यूनतम साझा कार्यक्रम मार्फत सरकारले आफ्नो काम गर्नेछ ।