जीवन विकासको स्थापना दिवसमा वृक्षरोपण

विराटनगर । जीवन विकास समाजले मोरङको जहदा गाउँपालिका– ४ रामचोकमा वृक्षरोपण गरेको छ । शनिबार २७ औं स्थापना दिवसको अवसरमा समाजले वृक्षरोपण गरेको हो ।

विक्रम सम्वत् २०५४ सालमा स्थापना भएको जीवन विकास समाजले शिक्षा, स्वास्थ्य, कृषि र वातावरण संरक्षणको क्षेत्रमा काम गरिरहेको छ । जीवन विकास लघुवित्त वित्तीय संस्थाको प्रवद्र्धक संस्था पनि जीवन विकास समाज हो । समाजको संस्थापक मोरङ क्षेत्र नम्बर ५ का प्रतिनिधिसभा सदस्य योगेन्द्र मण्डल हुन् ।

स्थापना दिवसको अवसरमा रामचोकमा  कालोपत्रे सडक किनारमा बिरुवा रोपेको समाजले जनाएको छ । समाजका उपाध्यक्ष अजयकुमार मण्डलको अध्यक्षतामा सुरु भएको वृक्षरोपण कार्यक्रममा जीवन विकास लघुवित्त वित्तीय संस्थाका प्रमुख कार्यकारी अधिकृत संजयकुमार मण्डल प्रमुख अतिथि थिए ।

कार्यक्रममा उनले वातावरण संरक्षणका लागि वृक्षरोपण गर्न आवश्यक रहेको बताए । रोपिएको बिरुवा संरक्षणका लागि उनले स्थानीयवासीलाई आग्रह गरे ।

पृथ्वीको तापक्रम बढ्दै गएको बताउँदै उनले तापक्रमलाई सन्तुलनमा राख्न पनि वृक्षरोपण गर्नुपर्ने बताए । ‘पछिल्लो वर्षहरूमा पृथ्वीको तापक्रम निरन्तर बढ्दो छ, वातावरणमा असन्तुलन छ,’ उनले भने,‘ तापक्रम नियन्त्रण गर्ने उपाय वृक्षरोपण नै हो, वृक्षरोपण पछि संरक्षणमा समाज सचेत हुनुपर्छ ।’