कोशी प्रदेशले बिर्सियो शिक्षा दिवस 

विराटनगर । कोशी प्रदेश सरकारले शिक्षा दिवसलाई  बेवास्ता गरेको पाइएको छ ।  असोज २ गतेलाई  शिक्षा दिवसको रुपमा मनाउने चलन छ । तर  बुधबार प्रदेश सरकारले राष्ट्रिय शिक्षा दिवसमा कुनै कार्यक्रम गरेन ।

शिक्षा दिवसको दिन प्रदेश सरकारका मन्त्री भने प्रदेशसभामा मुख्यमन्त्री हिक्मतकुमार कार्कीकाे विश्वासको मत लिने बैठकमा सहभागी थिए ।

शिक्षा हेर्ने जिम्मेवारी पाएको सामाजिक विकास मन्त्रालय पनि कुनै कार्यक्रम नभएको जनाएको छ । सामाजिक विकास मन्त्रालयको शैक्षिक योजना तथा अनुसन्धान शाखा प्रमुख यादवप्रसाद दुलालका अनुसार बुधबार शिक्षा दिवसमा प्रदेश सरकारले कुनै कार्यक्रम आयोजना गरेन । शिक्षा दिवस भन्दा केही दिनअघि जिल्ला शिक्षा समन्वय इकाई र विराटनगर महानगरपालिकालाई छलफलमा बोलाएर  विद्यालय तहमा आफै कार्यक्रम गर्न आग्रह गरेको उनले बताए ।

सामाजिक विकास मन्त्री पाँचकर्ण राई बुधबार शिक्षासँग सम्बन्धित कुनै कार्यक्रममा गएनन् । उनी मुख्यमन्त्रीको विश्वासको मत लिनका लागि बोलाएको प्रदेशसभा बैठकमा सहभागी भएको उनका स्वकीय सचिव कमल पुरीले जानकारी दिए ।

प्रदेश सरकारले कुनै कार्यक्रम आयोजना नगरेपछि मुख्यमन्त्री कार्की पनि विश्वासको मत लिएपछि नेपाल नेत्र ज्योति संघले आयोजना गरेको कार्यक्रममा सहभागी भएका थिए । मुख्यमन्त्री कार्कीका प्रेस सल्लाहकार विक्रम लुइटेलले शिक्षा सम्बन्धी कुनै कार्यक्रममा मुख्यमन्त्री सहभागी नभएको जानकारी दिए ।

शिक्षा क्षेत्रको अपमान भयो  ः पुरी 

कोशी प्रदेश सरकारले शिक्षा क्षेत्रलाई अपमान गरेको निजी तथा संस्थागत विद्यालय अर्गनाइजेशन प्याब्सनका पूर्व केन्द्रीय अध्यक्ष टिकाराम पुरी बताउँछन् । संघीय सरकारले राष्ट्रिय शिक्षा दिवस मनाउने घोषणा गरेपनि कोशी प्रदेशले शिक्षा दिवस नमनाउनु दुर्भाग्यपूर्ण रहेको उनको भनाई छ । उनी भन्छन्,‘प्रदेश सरकारले शिक्षा दिवसलाई वास्ता नगर्नु कोशी प्रदेशका शिक्षण संस्था र शिक्षा क्षेत्रमाथिको अपमान हो ।’

नेपालमा शिक्षा दिवस मनाउने मिति परिवर्तन भइरहदा  प्रभावकारी कार्यक्रम हुन नसकेको  सामाजिक विकास मन्त्रालयको शैक्षिक योजना तथा अनुसन्धान शाखा प्रमुख दुलालले बताए । उनका अनुसार यसअघि तत्कालीन मुख्यमन्त्री शेरधन राईको उपस्थितिमा एक पटक ‍(२०७६) सालमा शिक्षा दिवस मनाइएको थियो ।

सरकारले २०३१ सालदेखि १२ फागुनमा राष्ट्रिय शिक्षा दिवस मनाउन सुरु गरेको थियो । २०६२–६३ जनआन्दोलन पछि १२ फागुनमा शिक्षा दिवस मनाइएन । २०६४ सालमा तत्कालीन सरकारले राष्ट्रिय शिक्षा दिवस र अन्तर्राष्ट्रिय साक्षरता दिवस एकै दिन मनाउने निर्णय गरेको थियो । सोही अनुसार २०६४ सालदेखि २०७६ सालसम्म ८ सेप्टेम्बरको दिन राष्ट्रिय शिक्षा दिवस मनाइयो । तर २०७७ सालमा  सरकालरे ८ सेप्टेम्बरमा हुँदै आएको शिक्षा दिवस स्थगित गर्याे । नयाँ मिति तय नहुँदा २०७७, ०७८ र ०७९ मा शिक्षा दिवस मनाइएकाे थिएन । गत वर्षबाट अनिवार्य निशुल्क शिक्षा ऐन–०७५ जारी भएको दिन  २ असोजलाई राष्ट्रिय शिक्षा दिवसको रुपमा मनाउने निर्णय भएकाे थियाे ।