विराटनगरको कपडा पसलमा आगलागी

विराटनगर । विराटनगरको एउटा कपडा पसलमा बुधबार बिहान आगलागी भएको छ । आगलागीमा पसलकाे सामान जल्दा करिब एक करोड बराबरको क्षति भएको  प्रहरीले जनाएकाे छ ।

विराटनगर महानगरपालिका–७ जैन भवननजिक दीपक कायस्थको घरको भुइँ तलामा रहेको कपडा पसलमा बिहान ४ः३० बजेतिर आगलागी भएको प्रहरीले जनाएको छ । प्रहरीका अनुसार कायस्थको घरको सटर भाडामा लिएर विराटनगर–६ का सन्तोष रौनियाले कपडा पसल चलाउँदै आएका थिए ।

मोरङ प्रहरीका प्रवक्ता डीएसपी ज्ञानेन्द्रबहादुर बस्नेतका अनुसार आगलागीको कारण खुलेको छैन । उनले घटनाको अनुसन्धान भइरहेको बताए । विराटनगर महानगरपालिकाको दमकल र स्थानीयको सहयोगमा प्रहरीले करिब डेढ घण्टापछि आगो नियन्त्रणमा लिएको थियो । आगोले पसलमा रहेका सबै कपडा जलेर नष्ट भएको छ । आगलागीमा अन्दाजी १ करोड बराबरको क्षति भएको डीएसपी बस्नेतले बताए ।