वित्तीय संस्थाको समस्या सामधान गर्ने बताउँदै मुख्यमन्त्रीले मागे विश्वासको मत

विराटनगर । कोशी प्रदेशका मुख्यमन्त्री हिक्मितकुमार कार्कीले विश्वासको मत मागेका छन् । बुधबार प्रदेशसभा बैठकमा उनले विश्वासको मत मागेका हुन् ।

विश्वासको मत माग्ने क्रममा आफ्नो नेतृत्वमा सरकारले प्रदेशमा आश देखाउने काम गरेको उनले बताए । उनले वित्तीय संस्थामा देखिएको समस्या सामधान गर्ने बताए ।

‘वित्तीय संस्थाहरू मुलतः सहकारी र लघुवित्तमा उत्पन्न समस्या समाधान गर्न नेपाल सरकार, नेपाल राष्ट्र बैंक र सरोकारवालासँगको सहकार्यमा तमाम सहकारी र लघुवित्त पीडितहरुलाई न्याय र सहकारी र लघुवित्तहरुलाई पनि संरक्षण गर्नुपर्ने छ,’ उनले भने,‘ सहकारी सम्बन्धी समस्याको समाधानका लागि आवश्यक पर्ने नीतिगत तथा कार्यगत व्यवस्थाका लागि सहकारी ऐनमा समयानुकुल संसोधन आवश्यक देखिन्छ ।’

संघीयता कार्यान्वयन र सार्वजनिक संरचनागत सुधार गरी सङ्घीयता कार्यान्वयनका समस्या समाधान गर्ने उनले बताए । सार्वजनिक सेवा प्रवाहमा सुधार गर्न, सुशासन प्रवर्द्धन गर्न, व्यवसायिक वातावरण निर्माणमा असहज र असान्दर्भिक नीति तथा कानुनमा परिमार्जन गर्दै जाने उनले बताए ।