इटहरीमा सुरु भयो विद्युतीय नगरबस,भाडा २० रुपैयाँ मात्रै

विराटनगर । इटहरी उपमहानगरपालिकाले नगरबस सेवा सुरु गरेको छ । आजदेखि ४ वटा विद्युतीय नगरबस सञ्चालन सुरु गरेको हो । सुरुवाती चरण भन्दै आज र भोलि निःशुल्क सञ्चालन हुनेछ ।

इटहरी उपमहानगरपालिकाका मेयर हेमकर्ण पौडेलले आज नगर बसको सुरुवात गरे । विद्युतीय बस सेवा वातावरणमैत्री, सुरक्षित, भरपर्दो, र उपभोक्तामुखी हुने उनले बताए ।

ग्रामीण भेगमा बस्ने जनतालाई बजारसँग जोड्ने उद्देश्यले बस सञ्चालनमा ल्याएको उनले बताए । तीस वर्षदेखिको इटहरीको सपना आफूले पुरा गरेको उनको दाबी छ ।

नगरबस बिहान ७ बजेबाट ११ बजेसम्म र दिउँसो २ बजेदेखि बेलुकी ७ बजेसम्म नियमित सञ्चालन हुनेछन् । नागरिकलाई बसको सेवा शुल्क २० तोकिएको छ ।