विराटनगरमा भैँसीसँग ठोक्किए चार गाडी, पाँच जना घाइते 

विराटनगर । विराटनगरमा भैँसीसँग चार वटा सवारी ठोक्किएर दुर्घटना भएको छ । दुर्घटनामा परी पाँच जना घाइते भएका छन् । ठक्करबाट भैँसी मरेको छ ।

विराटनगर महानगरपालिका –१४ मलाया रोडमा मङ्गलबार बेलुका भैँसीसँग दुई वटा मोटरसाइकल, एउटा जिप र एउटा कार ठोक्किएर दुर्घटना भएको प्रहरीले बताएको छ । 

सडक पार गर्दै गरेको छाडा भैँसीसँग सुरुमा जिप ठोक्किएको थियो । जिपसँग ठोक्किएर भैँसी लडेको थियो । लडेको भैँसीमा कार र दुई वटा मोटरसाइकल पनि ठोक्किएर दुर्घटना भएको हो ।

प्रहरीका अनुसार को २५ प ६३८७ नम्बरको मोटरसाइकलमा सवार दुई जना घाइते भएका छन् । को ११ प २९०९ मोटरसाइकलमा सवार एक जना र बा २९ च २६१८ नम्बरको कारमा सवार दुई जना घाइते भएका छन् ।  घाइते सबैलाई न्युरो अस्पताल विराटनगरमा भर्ना गरिएको छ ।