सर्पले डसेर जहदामा एक नाबालिकाको मृत्यु

विराटनगर । विषालु सर्पले डसेर मोरङको जहदा गाउँपालिका–२ भीमपुर बेरियामा नाबालिकाको मृत्यु भएको छ ।

मंगलबार बिहान सर्पले टोकेर स्थानीय बिजु मुर्मूकी ८ वर्षीया छोरी चाँद मुर्मूको मृत्यु भएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए ।

उनका अनुसार सुतिरहेकी नाबालिका पिसाब गर्न भनेर बिहानका राति २ बजेतिर अभिभावकसँगै घरबाट बाहिर निस्किएकी थिइन् ।

पिसाब गर्दैगर्दा घरको आँगनमै नाबालिकालाई सर्पले टोकेको थियो । सर्पले डसेर गम्भीर घाइते भएकी नाबालिकालाई उपचारका लागि विराटनगरको कोशी अस्पताल ल्याइएको थियो । अस्पतालमा उपचारका क्रममा मंगलबार बिहान मृत्यु भएको हो ।