विराटनगरमा स्कोरपिओबाट १ सय ४६ किलो गाँजा बरामद, दुई जना पक्राउ

विराटनगर । प्रहरीले विराटनगरमा स्कोरपिओ गाडीबाट १ सय ४६ किलो गाँजासहित दुई जनालाई पक्राउ गरेको छ । भारतको जोगवनीतिर जाँदै गरेको को २ च ७५९ नम्बरको स्कोरपिओबाट सोमबार राति गाँजा बरामद गरेको हो ।

स्कोरपिओमा गाँजा ओसारपसार भइरहेको विशेष सूचनाका आधारमा नियन्त्रणमा लिन लागुऔषध नियन्त्रण ब्युरो विराटनगर र इलाका प्रहरी कार्यालय रानीका इन्सपेक्टर प्रकाश थापा नेतृत्वको संयुक्त टोली खटिएको थियो ।

विराटनगर महानगरपालिका–१७ मण्टापोखरीबाट स्कोरपिओलाई प्रहरीले राति ८ः४५ बजेतिर नियन्त्रणमा लिएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले जानकारी  दिए ।

६ वटा बोराभित्र प्याक गरेर गाडीको पछाडिको साइडमा लुकाइछिपाइ राखिएको अवस्थामा गाँजा फेला परेको उनको भनाइ छ । प्रहरीलाई देखेपछि स्कोरपिओ तीव्र गतिमा भागेको थियो । नियन्त्रणमा लिने क्रममा स्कोरपिओले प्रहरीलाई ठक्कर दिएको छ ।

डीएसपी बस्नेतका अनुसार स्कोरपिओको ठक्करबाट लागुऔषध नियन्त्रण ब्युरो विराटनगरमा कार्यरत प्रहरी हवल्दार कैलाश खत्री सामान्य घाइते भएका छन् । स्कोरपिओभित्र गाँजा फेला परेपछि सुनसरीको धरान घर भएका २ जनालाई प्रहरीले पक्राउ गरेको छ ।

गाडी चालक धरान उपमहानगरपालिका–४ १७ का ४५ वर्षीय सुक्षिम राई र स्कोरपिओमा सवार धरान–११ का ४६ वर्षीय देवराज राईलाई पक्राउ गरिएको बस्नेतले बताए । उनका अनुसार नियन्त्रणमा लिएको स्कोरपिओ र बरामद भएको गाँजासहित दुवै जनालाई इलाका प्रहरी कार्यालय रानीमा राखिएको छ । पक्राउ परेकाविरुद्ध लागुऔषध ऐनअन्तर्गतको मुद्दा चलाउने तयारी प्रहरीले गरेको छ ।

प्रहरीले सोमबार बिहान पनि विराटनगर महानगरपालिका–१५ स्थित २ नम्बर ढाटबाट ४३ किलोग्राम गाँजासहित बा ८ च ७८८० नम्बरको कारलाई नियन्त्रणमा लिएको थियो । प्रहरीले चालक विराटनगर–१५ का ३२ वर्षीय गणेश चौधरी र कारमा सवार विराटनगर–१३ का २२ वर्षीय राजेश परियारलाई पनि पक्राउ गरेको थियो ।