रङ्गेलीमा कांग्रेसको आन्दोलन फिर्ता

विराटनगर । रङ्गेली नगरपालिकाको निर्णय विरुद्ध नेपाली काङ्ग्रेसले सुरु गरेको आन्दोलन फिर्ता भएको छ । पालिकाले वृद्धि गरेको कर घटाउने सहमति भएपछि कांग्रेसले गरेको आन्दोलन फिर्ता लिएको हो ।

नेपाली कांग्रेसका जिल्ला सचिव मोदराज घिमिरेले पालिकाले कर वृद्धिको निर्णय फिर्ता लिएपछि आन्दोलनका कार्यक्रम फिर्ता लिएको जानकारी दिए । ‘हामीले उठाएको एजेण्डा अनुसार माग सम्बोधन गर्न पालिका तयार भएपछि आन्दोलन फिर्ता भयो’, उनले भने ।

पालिकाले मालपोत कर प्रतिकट्ठा २० रुपैयाँबाट बढाएर ३४ रुपैयाँ बनाएको थियो । अब कांग्रेसको माग बमोजिम २६ रुपैया कायम हुने भएको छ । त्यस्तै फुसको घरको यसअघि १०० रुपैयाँ कर निर्धारण गरिएको थियो, अब कर नलगाउने सहमति भएको घिमिरेले बताए । सिफारिस दस्तुर ५०० रुपैयाँमा झारिएको उनले बताए ।

काङ्ग्रेस, नेकपा एमाले जिल्ला तहका पदाधिकारी र पालिका प्रमुख र उपप्रमुखसहितको छलफलपछि पालिका कर घटाउन सहमत भएको थियो । दुई दलबीच भएको सहमति अनुसार वृद्धि भएको घर अब घट्ने घिमिरेले बताए ।