शेखर काेइराला समूहलाई बाहिरै राखेर सरकारमा जाँदै कांग्रेस

विराटनगर । नेपाली कांग्रेसले कोशी प्रदेश सरकारमा तीन मन्त्रीलाई पठाउने निर्णय गरेको छ । सरकारमा सहभागी हुने निर्णय गरेको डेढ महिनापछि नेपाली कांग्रेसले कोशी प्रदेश सरकार तीन मन्त्री र एक राज्यमन्त्री पठाएको हो ।

नयाँ मन्त्रीको शपथ आज बिहान साढे ९ बजे हुनेछ ।

सरकारमा संस्थापन समूहका तीन मन्त्री र एक राज्यमन्त्री जाँदै गर्दा डाक्टर शेखर कोइराला समूह भने असन्तुष्ट बनेको छ । मागे अनुसारको मन्त्रालय नपाएपछि शेखर समूहले मन्त्रीको नाम दिएको छैन । शेखर समूहले नाम नदिएपछि उनको भाग छाडेर सरकारमा सहभागी हुने तय भएको कांग्रेस प्रमुख सचेतक गोपाल तामाङले जानकारी दिए ।

कांग्रेसबाट कोशी सरकारको नेतृत्व प्रदेश सांसद तथा प्रदेश महामन्त्री भुपेन्द्र राईले गर्नेछन् । उनी भौतिक पूर्वधार मन्त्री बन्ने तय भएको छ । राई कृष्णप्रसाद सिटौला समूहका नेता हुन् । खगेनसिह हाङ्गाम उद्योग कृषि तथा सहकारी मन्त्री, सदानन्द मण्डल पर्यटन, वन, वातावरण मन्त्री बन्ने निश्चित भएको छ । हाङ्गाम सभापति शेरबहादुर देउवा समूहका हुन् । मण्डल भने संस्थापन भित्रकै ज्ञानेन्द्र कार्कीको समूहका हुन् । कृष्ण सिटौला पक्षका भूमि राजवंशी भौतिक पूर्वाधार राज्यमन्त्री बन्नेछन् ।

एक मन्त्री र एक राज्यमन्त्री डाक्टर शेखर कोइराला समूहका लागि छुट्याइएको छ । कोशीमा कोइराला पक्षले २ वटा मन्त्रालय मागेको थियो ।

संस्थापन पक्षले एउटा मन्त्री र एउटा राज्यमन्त्री दिने बताएको थियो । गत साउन १२ मा नै सरकारमा सहभागी हुने निर्णय गरेको कांग्रेस कोइराला समूहको २ मन्त्रीको अडानका कारण सरकारमा सहभागी भएको थिएन् ।