कांग्रेस-एमाले विवाद : रंगेलीकाे ‘काउन्टर’ विराटनगरमा

विराटनगर । नेकपा एमाले मोरङ जिल्ला कमिटीले विराटनगर महानगरपालिकाका प्रमुख नागेश कोइरालालाई आफ्नो पालिकाको काममा ध्यान दिन ध्यानआकर्षण पत्र बुझाएको छ । महानगरपालिकाको काम छाडेर बुधबार रंगेली नगरपालिका विरुद्धको आन्दोलनमा कोइराला सहभागी भएपछि एमाले जिल्ला कमिटीले पालिकामा ध्यान दिन आग्रह गरेको हो ।

एमालेको नेतृत्वमा रहेको रंगेली नगरपालिकाविरुद्ध नेपाली कांग्रेसको तर्फबाट प्रदर्शन हुँदा विराटनगरका मेयर कोइराला बुधबार सहभागी भएका थिए । त्यसको ‘काउन्टर’मा एमाले मोरङले प्रमुख कोइरालालाई बिहीबार विकास निर्माणमा ध्यान दिन आग्रह गरेको हो ।

महानगर प्रमुखलाई ध्यानआकर्षण पत्र बुझाउन पुगेको एमालेले निर्वाचित भएको २ वर्ष ५ महिना बितेपनि महानगरले विकास निर्माणको सवालमा अपेक्षित काम गर्न नसकेको भन्दै काममा ध्यान दिन आग्रह गरेको छ । एमाले मोरङले सडक निर्माण, ढल निकास, स्वास्थ्य, शिक्षा र अन्य पूर्वाधार सम्बन्धी विभिन्न स्थानीय विकासका मुद्दाहरूमा ध्यान केन्द्रित गर्न आग्रह गरेको छ ।

‘विराटनगरको मेयर रंगेलीमा पुगेर पालिकाले गरेको संस्थागत निर्णयको विपक्षमा जे प्रतिक्रिया दिनुभयो त्यो बेठिक थियो । उहाँको क्षेत्राधिकार भन्दा बाहिर गएर एउटा नगरप्रमुखले अर्को नगरप्रमुखको सार्वभौम निर्णय गर्ने अधिकारलाई जुन प्रकारले हस्तक्षेप गर्नुभयो त्यो न्यायोचित थिएन । किन त्यसो गर्नु भयोभन्ने हाम्रो प्रश्न हो,’ एमाले मोरङका अध्यक्ष बाबुराम कार्कीले भने ।

उनले एउटा पालिकाले गरेको कामको विषयमा अर्को पालिका प्रमुखले बोल्नु उचित नभएको बताए । मेयर कोइराला रंगेली पुगेर नगरपालिकाविरुद्ध भएको आन्दोलनको नारा जुलुस र प्रदर्शनमै सहभागी भएका थिए ।

‘एउटा पालिका नेतृत्वले अर्को पालिकालाई या त्यो प्रकारको प्रतिक्रिया दिनेकुरा बेठिक हो, तपाईंको गरेको बेठिक हो भनेर ध्यानआकर्षण पत्र दियौं । ज्ञापन पत्र दियौं,’ कार्कीले भने, ‘महानगरमा उहाँ (कोइराला)ले गर्नुभएको क्रियाकलाप संगतीपूर्ण छैन । ‘ट्रान्परेन्स’ छैन । ‘एकाउन्टेबल’ छैन । आफैंले गरेका निर्णय बदर गर्नुभएको छ ।’

उनले कोशी प्रदेशको राजधानी भएको ठाउँमा मेयरले एउटा शौचालयसमेत बनाउन नसकेको बताए । ‘शौचालयसमेत बनाउन सक्नु भएको छैन । जनताका लागि कुनै नयाँ दिन सक्नु भएको छैन,’ कार्की भन्छन्, ‘रंगेलीबाट केही त सिक्नुहोस् । रंगेलीले गरेको ‘इनोभेसन’को विषयमा, ‘गार्डेन’को विषयमा र बजेट सञ्चालनका विषयमा सिक्नुहोस भन्यौं ।’ उनले नगरप्रमुखलाई आफ्नो शैली सच्याउन भनिएको बताए ।

‘कांग्रेसको ‘कन्सन’को विषयमा रंगेलीका मेयर साबले मेरो भाइ बिरामी छ, दिल्लीबाट उपचार गरेर आएपछि छलफल गरौं भन्नु भएको रहेछ । तर कांग्रेसले आन्दोलन गरेको छ । आन्दोलनका नाममा जथाभावी गरेको छ,’ कार्कीले भने, ‘रंगेलीको भन्दा पनि विराटनगरको गर्न काम गर्न सक्नु भएको छैन । त्यसका बारेमा उहाँलाई भन्यौं ।’

२०७९ को स्थानीय तहको निर्वाचनपछिको करिब २ वर्ष ५ महिनाको अवधिमा महानगरसँग ठोस, प्रभावकारी एवं दीर्घकालीन योजनामा कमी भएको एमाले मोरङका अध्यक्ष कार्कीले बताए । एमालेले महानगर प्रमुख कोइरालालाई विराट राजाको दरबार, प्रधानमन्त्री पार्कलगायत विकास निर्माणको काममा भएको ढिलासुस्तीको अन्त्य गरी समयसीमाभित्र निर्माण कार्य सम्पन्न गर्न आग्रह गरेको छ ।

नगरपालिकाबाट संचालन हुने नगर बस अविलम्ब संचालन गर्नु पर्ने, नगरभित्र फोहरमैलामा देखिएको लापरबाहीको अन्त्य गर्दै प्रशोधन र उचित व्यवस्थापन गर्नुपर्ने एमालेको माग छ । एमालेले नगर क्षेत्रको खेलकुदको प्रवर्दनका लागि अविलम्ब नगर खेलकुद विकास समिति गठन गर्नुपर्ने, विराटनगरको डुबान र ढल निकासका लागि स्थायी समाधान गर्नुपर्ने, नगरले विगतमा थालनी गरी रोकिएका अधुरा योजनाहरु सम्पन्न गर्नुपर्ने माग गरेको छ ।

ध्यानआकर्षण पत्र बुझ्दै महानगर प्रमुख कोइरालाले विकास निर्माणका काममा आवश्यक बजेट नहुँदा ढिलासुस्ती भएको बताए । बजेटका लागि प्रदेश र संघीय सरकारसमक्ष पहल भइरहेको उनले बताए । कोइरालाले बुधबार नगरप्रमुखको रुपमा नभइ पार्टीको मोरङ जिल्ला उपसभापतिको हैसियतमा आन्दोलनमा सहभागी भएको बताए ।