कोशी प्रदेश : सात मिनी  संसद्‌मा परेन दोहोरो उम्मेद्वारी

विराटनगर । कोशी प्रदेशको ७ वटा संसदीय समितिको सभापतिमा एकल उम्मेदवारी परेको छ ।

मिनी संसद्को रुपमा रहेको ७ विषयगत समिति मध्ये कांग्रेस-एमालेले ३–३  समितिकाे सभापतिमा मनाेनयन दर्ता गरेका छन् । माओवादी केन्द्रले एउटा समितिको सभापतिमा मनोनयन दर्ता गरेको छ ।

प्रदेशसभा सचिवालयका सचिव गोपाल पराजुलीका अनुसार होमबहादुर थापाले प्राकृतिक स्रोत तथा पूर्वाधार समिति, कमला दर्नालले न्याय प्रशासन तथा विधायन समिति र रामदेव यादवले उद्योग, पर्यटन तथा वातावरण समितिको सभापतिमा मनोनयन दर्ता  गरेका छन् । उनीहरु नेकपा एमाले सांसद हुन् ।

सामाजिक विकास समिति सभापतिमा गयानन्द मण्डल, सुशासन तथा योजना समितिको सभापतिमा खगेश्वरी पौडेल र अर्थ समितिको सभापतिमा विनोद राईले उम्मेदवारी दर्ता गरेका छन् । उनीहरु नेपाली कांग्रेसका हुन् ।

सार्वजनिक लेखा समितिको सभापतिमा राजन किरातीको उम्मेदवारी परेको छ । उनी नेकपा माओवादी केन्द्रका सांसद हुन् ।

सात वटै समितिको सभापतिमा एकल उम्मेदवारी परेको प्रदेशसभा सचिवालयका सचिव पराजुलीले जानकारी दिए । सभापति निर्वाचित भएको घोषणा र सपथ ग्रहण भने शुक्रबार दिउँसो २ बजे हुनेछ ।