कोशीमा सरकारले बाड्न थाल्यो अस्थायी लाइसेन्स

विराटनगर । कोशी प्रदेश सरकारले अस्थायी लाइसेन्स (सवारी चालक अनुमति पत्र) वितरण सुरु गरेको छ । प्रदेशमा पहिलो पटक प्रयोगात्मक परीक्षा (ट्रायल) पास गरेहरुलाई लाइसेन्स वितरण गरेको हो ।

प्रदेशमा स्मार्ट लाइसेन्स’को लागि ३ वर्षसम्म पर्खनुपर्ने बाध्यता छ । सरकारले अब ट्रायल पास गरे लगतै अस्थायी लाइसेन्स दिनेछ ।

इटहरीस्थित यातायात व्यवस्था कार्यालयमा आयोजित कार्यक्रममा सेवाग्राहीलाई लाइसेन्स दिँदै मुख्यमन्त्री हिक्मतकुमार कार्की र आन्तरिक मामिला तथा कानुनमन्त्री लिलाबल्लभ अधिकारीले सेवाको औपचारिक उद्घाटन गरे ।

प्रदेशका नागरिकको हित र सुविधालाई प्रदेश सरकारले उच्च प्राथमिकतामा राखेको बताउँदै मुख्यमन्त्री कार्कीले अबदखि ‘ट्रायल’ पास भएलगत्तै लाइसेन्स पाइने जानकारी दिए ।

आन्तरिक मामिला तथा कानुनमन्त्री अधिकारीले यातायात व्यवस्था विभागले अस्थायी लाइसेन्स वितरणका लागि गरेको प्राविधिक सहयोगको प्रशंसा गर्दै चाँडै ‘स्मार्ट लाइसेन्स’ छाप्ने गरिको तयारी भइरहेको बताए ।

गत साउन ३२ गते सातवटै प्रदेशका यातायात व्यवस्था मन्त्रालयका मन्त्रीहरुको संयुक्त बैठकले सवारी चालक अनुमति पत्रको स्थायी कार्ड प्रदेशबाटै छाप्ने र स्थायी कार्ड छाप्ने व्यवस्थापन गर्न लाग्ने समयसम्म क्यूआर कोडसहितको अस्थायी सवारी चालक अनुमतिपत्रको कार्ड छाप्ने निर्णय गरेको थियो । सोही अनुसार सबैभन्दा पहिला कोशी प्रदेशले अस्थायी कार्ड वितरण गरेको हो ।

कोशी प्रदेशमा सवारी चालक अनुमतिपत्र जारी गर्ने यातायात व्यवस्था सेवा कार्यालयहरू ७ वटा छन् । अब सबै कार्यालयबाटै अस्थायी लाइसेन्स पाउने व्वस्था सुरु गरिएको छ । नयाँ, थप र प्रतिलिपिसमेत गरी अहिले कोशीबाट मासिक १८ हजार सवारी चालक अनुमतिपत्रको लागि निवेदन आउने गरेको छ ।