कोशीमा संसदीय समिति सभापतिको मनोनयन आज

विराटनगर । कोशी प्रदेशको ७ वटा संसदीय समितिको सभापतिको निर्वाचनका लागि आज मनोनयन दर्ता हुनेछ । मिनी संसदको रुपमा रहेको समिति सभापति निर्वाचन र परिणाम घोषणा हुने छ ।

संसदीय समितिमा कांग्रेस र एमालेले ३–३ वटा बाडेका छन् । एउटा माओवादी केन्द्रले पाउनेछ ।

कोशी प्रदेशसभामा न्याय प्रशासन तथा विधायन समिति, सुशासन तथा योजना समिति, अर्थ समिति, सार्वजनिक लेखा समिति, सामाजिक विकास समिति, उद्योग पर्यटन तथा वातावरण समिति र प्राकृतिक स्रोत तथा पूर्वाधार समिति छन् ।

एमालेले उद्योग, पर्यटन तथा वातावरण समिति, प्राकृतिक स्रोत तथा पूर्वाधार समिति र न्याय प्रशासन तथा विधायन समितिको सभापतिमा मनोनयन दर्ता गर्ने एमाले प्रमुख सचेतक रेवतीरमण भण्डारीले जानकारी दिए ।

नेपाली कांग्रेसले सुशासन तथा योजना समिति, अर्थ समिति, र सामाजिक विकास समितिको सभापतिमा मनोनयन गर्नेछ ।

प्रमुख प्रतिपक्षी माओवादी केन्द्रले सार्वजनिक लेखा समितिको नेतृत्व दिने सहमति छ । लेखा समिति प्रमुख प्रतिपक्षी दललाई दिने संसदीय परम्परा हो ।