पूजाको प्रसाद खाँदा गाउँ नै बिरामी 

विराटनगर । झापामा पूजाको प्रसादी खाँदा एउटा गाउँ नै अधिकांश बिरामी परेका छन् । अर्जुनधारा नगरपालिका– ९ को खरबन्दी गाउँका अधिकांश बिरामी परेका हुन् । स्थानीय रिता निरौलाको बुधबार पूजा लगाइएको थियो । पूजामा ६० भन्दा जना भन्दा बढीले प्रसादी खाएका थिए । प्रसाद खाने सबै बिरामी परेको अर्जुनधारा नगरपालिका ९ का वडा अध्यक्ष भीष्म मिश्रले जानकारी दिए ।

स्थानीय विद्या कटवालका अनुसार पूजा घरमा पुगेर प्रसाद खाने धेरै बिरामी छन् । घरमा ल्याएको प्रसाद अलिक कम समस्या देखिएको छ । ‘पूजा घरमा पुगेर सब्जी र रोटी अचार खाने धेरै विरामी छन् । घरमा ल्याएको प्रसाद खानेहरूलाई पनि समस्या  छ’ उनले भनिन्,’ गाउँका सबै बिरामी छन् ।’

पूजामा प्रसाद खाएकाे केही समयपछि सबैलाई वान्ता र डाइरिया  भएको थियाे । ज्वरो पनि आएको छ । त्यसपछि राति नै स्थानीय क्लिनिक लगिएकाे थियाे ।  ‘हिजो राति स्थानीय क्लिनमा आएर स्लाइन चढाएर फर्कियौँ तर निको भएन,’ उनले भनिन्,‘  वान्ता डाइरिया नडाकिएपछि आज विहानै आएका छाैं, ज्वरो पनि १०३, १०४ डिग्री छ ।’

पुजाको प्रसादीमा  फुड पोइजनिङ हुँदा गाउँ नै बिरामी परेको अध्यक्ष मिश्रले बताए । बिरामीको स्थानीय दुई क्लिनकमा उपचार भइरहेको उनले जानकारी दिए ।