रङ्गेली नगरपालिकाविरुद्धको आन्दोलनमा विराटनगरका मेयर

विराटनगर । विराटनगर महानगरपालिकाका मेयर नागेश कोइराला  रङ्गेली नगरपालिका विरुद्धको आन्दोलनमा सहभागी भएका छन् ।

एमालेको नेतृत्वमा रहेको रङ्गेली नगरपालिकाले निर्धारण गरेको करको विरुद्ध नेपाली कांग्रसले आन्दोलन गरिरहेको छ । कोइराला बुधबार दिउँसो रङ्गेलीकाे नेतृत्वविरुद्धको  आन्दोलनमा सहभागी भएका हुन् ।

एउटा स्थानीय सरकारका प्रमुखले अर्को स्थानीय सरकारविरुद्ध भएको आन्दोलनमा सशरीर उपस्थित भएर ऐक्यबद्धता जनाएसँगै उनी विवादमा तानिएका छन् ।

नगरपालिका विरुद्धको आन्दोलनका क्रममा कोइराला मंगलबार पनि रङ्गेली पुगेका थिए । प्रमुख जिल्ला अधिकारी, प्रहरी उपरीक्षकसँगै पुगेका उनले आन्दोलनरत पक्षसँग प्रशासनको टोलीसँग बसेर छलफल गरेका थिए ।

मोरङका प्रमुख जिल्ला अधिकारी प्रेमप्रसाद भट्टराईका अनुसार आन्दोलनरत पक्षलाई पालिका प्रमुख फर्किएपछि छलफलबाट समस्या समाधान गर्न आग्रह गरिएको थियो ।  तर कांग्रेस तयार भएन । रङ्गेली नगर प्रमुख दीलिप बगडीया भने उपचारको सिलसिलामा भारतमा छन् ।

रङ्गेली नगरपालिकाले कर वृद्धि गरेपछि पार्टीको तर्फबाट आन्दोलन भइरहेको कांग्रेस सचिव मोदराज घिमिरेले जानकारी दिए । आन्दोलनमा विराटनगर महानगरपालिकाका प्रमुख कोइराला पनि सहभागी उनले बताए ।

विराटनगरका प्रमुख कोइरालाले भने पालिका प्रमुखको हैसियतमा नभइ पार्टीको तर्फबाट आन्दोलनमा सहभागी भएको बताए । ‘म नेपाली कांग्रेस जिल्लाको उपसभापति हो, रङ्गेलीमा उपसभापतिको रुपमा सहभागि भएको हुँ,’ कोइरालाले भने । उनी आन्दोलनमा जादा उनको कार्यकक्षमा सेवाग्राही भने पर्खिएर बसिरहेका थिए ।

नेपाली कांग्रेसको जिल्ला अधिवेशन नजिकिँदैछ । अधिवेशनमा उनले सभापतिमा उठ्ने तयारी गरिरहेका छन् । सभापतिमा उठ्ने तयारी गरिरहेका उनी पार्टीको गतिविधिमा सहभागी हुन भन्दै रङ्गेली पुगेको कांग्रेसका एक नेताले बताए ।