प्रहरीले लखेटेपछि ठाउँ फेरेर अनशनमा पूर्वमुख्यमन्त्री कार्की

विराटनगर । कोशी प्रदेशका पूर्वमुख्यमन्त्री केदार कार्की स्थान फेरेर पुन अनशनमा बसेका छन् ।

प्रदेशसभा सचिवालय अगाडि अनशन बसेका केदार कार्कीलाई प्रहरीले नियन्त्रणमा लिएर घर पुर्याएर छाडेको थियो । पुन फर्किएर उनी प्रदेशसभा सचिवालय नजिकै देवकोटा चोकमा अनशन बसेका हुन् । कार्की अहिले अनशन बसेको स्थान निषेधित क्षेत्रमा पर्दैन् ।

१० वर्षमुनिका बालबालिकाको विशिष्टीकृत उपचार सेवा निशुल्कलगायत माग राखेर कार्कीले यसअघि नै प्रदेशसभा सचिवालय अगाडि अनशन बस्ने बताएका थिए । उनले अनशन बस्ने स्थान प्रदेशसभा सचिवालय आसपाससहित पाँच स्थानलाई जिल्ला प्रशासन कार्यालय मोरङले दिउँसो ३ बजेदेखि अनिश्चितकालका लागि निषेधित क्षेत्र तोकेको थियो ।

निषेधित क्षेत्रमा अनशन बसेका कार्कीलाई प्रहरीले मंगलबार राति ८ बजे नियन्त्रणमा लिएर कार्कीलाई बुढीगंगा गाउँपालिका– २ टंकिसिनवारी स्थित उनको निवासमा लगेर छाडेको थियो । तर कार्की फर्किएर अनशनस्थलमै आएका थिए । अनशनस्थलमा प्रहरीले बस्न नदिएपछि उनी देवकोटा चोकमा अनशन बसेको कार्कीका प्रेस सल्लाहकार देवनारायण साहले जानकारी दिए ।

कार्कीलाई निषेधित क्षेत्रबाट हटाउने क्रममा प्रहरीले बल प्रयोग गरेको थियो । प्रहरीले बल प्रयोग गर्दा केदार कार्कीका केही समर्थक घाइते भएका छन् ।

अनशनस्थलबाट प्रहरीले केदार कार्कीका १५ जना समर्थकलाई नियन्त्रणमा लिएको थियाे । अनशनमा हस्तक्षेप भएपछि कार्कीका समर्थकले प्रदर्शन गरेका थिए ।