विराटनगरमा कृषि एक्स्पो हुँदै,  टाढाबाट आउनेलाई खाने बस्ने सुविधा

विराटनगर । विराटनगरमा पहिलो पटक आयोजना गर्न लागिएको कृषि एक्स्पोको तयारी पूरा भएको छ । नेपाल उद्योग वाणिज्य महासंघ कोशी प्रदेशले भदौ २७ देखि ३० गतेसम्म सञ्चालन हुनेछ ।

एक्स्पोमा १३० वटा स्टल रहने नेपाल उद्योग वाणिज्य महासंघ कोशी प्रदेश अध्यक्ष राजेन्द्र राउतले जानकारी दिए । एक्स्पोमा भारतको कलकत्ता र बिहारका २० वटा कृषिका स्टलहरू रहने उनले बताए ।

मेलामा अवलोकनका लागि बाहिर जिल्लाबाट आउनेका लागि खाना र बस्न निशुल्क गरिएको अध्यक्ष राउतले बताए । पहाडी जिल्लाबाट अवलोकनका लागि आउने र एकै दिनमा फर्कन नसक्नेका लागि बस्ने र खाने सुविधा दिइएको उनले बताए ।

एक्स्पो अवधिभर कृषि, पशुपक्षी, कस्टम हाइरिङ्ग,क्लाइमेट चेन्ज , जैविक मल तथा विषादी बनाउने र प्रयोग विधि लगायत विषयमा नेपाल र भारतका विज्ञको सहभागितामा संवाद राखिएको छ ।कृषि औजारको प्रदर्शनी, उन्नत जातका पशुपक्षीको प्रदर्शनी, पशुपक्षी तथा कृषि उपजको प्रतियोगिता खेतदेखि भान्साको अनुभव र फुट फेस्टिभल गरिने उनले बताए ।

एक्स्पोको उद्घाटनका लागि प्रधानमन्त्री केपी शर्मा ओलीलाई निम्तो गरिएको छ, यद्यपि उनी आउने नआउने टुङ्गो भइसकेको छैन ।

कृषिमा आत्मनिर्भर बनाउनका लागि सहयोग गर्ने उद्देश्यसहित आयोजना गरिएको एक्स्पो सञ्चालनका लागि एक करोड खर्च लाग्ने राउतले बताए ।