पाँच जिल्लामा चोरीको मुद्दा खेपिरहेका कैदीको मृत्यु

विराटनगर । पाँच वटा जिल्ला अदालतमा चोरीको मुद्दा खेपी रहेका एक कैदीको कोशी अस्पताल विराटनगरमा मृत्यु भएको छ । जिल्ला कारागार मोरङमा रहेका बेलबारी नगरपालिका–४ घर भएका ३४ वर्षीय मनीकुमार तामाङको मृत्यु भएको हो ।

कारागारका जेलर चेतराज बरालका अनुसार तामाङलाई उपचारका लागि भदौ २० गते साँझ कोशी अस्पताल भर्ना गरिएको थियो । उपचारका क्रममा आइतबार बिहान मृत्यु भएको हो । तामाङलाई खुट्टा सुन्निने र मुटु सम्बन्धी पुरानै समस्या थियो ।

मोटरसाइकल चोरीको मुद्दामा कारागारमा रहेका तामाङविरुद्ध विभिन्न ५ वटा अदालतमा चोरी मुद्दा दर्ता चलेको पाइएको छ । मोरङ, झापा, सुनसरी, इलाम र धनकुटामा उनी विरुद्ध चोरीको कसूरमा मुद्दा थियो ।

मोरङ अदालतको एउटा मुद्दामा ४ महिना कैद र १५ हजार रूपैयाँ र अर्को मुद्दामा १ लाख रूपैयाँ धरौटी माग भएको थियो ।

धरौटीबापतको रकम बुझाउन नसकेपछि तामाङ २०८० माघ २१ गतेदेखि मोरङ कारागारमा थिए ।

चोरी मुद्दामा धनकुटा अदालतले पनि धरौटीबापत ३ लाख ५० हजार र सुनसरी अदालतबाट २ लाख माग गरेको थियो, त्यो पनि उनले बुझाएका थिएनन् । झापा र इलाम अदालतमा पनि उनी विरुद्ध चोरी मुद्दा थियो ।

मोरङ कारागारमा ४ नाबालक र ९७ महिलासहित १ हजार ५९ जना कैदीबन्दी छन् । कारागारको क्षमता भने २७५ जना अटाउने मात्रै छ । क्षमता भन्दा बढी कैदीबन्दी भएका कारण कष्टकर रुपमा बसिरहेका छन् ।