दश वर्ष मुनीका बालबालिकाको उपचार निशुल्क माग गर्दै अनशन बस्ने केदार कार्कीकाे घाेषणा

विराटनगर । कोशी प्रदेशका पूर्व मुख्यमन्त्री केदार कार्कीले दश वर्ष मुनीका बालबालिकाको निशुल्क उपचारको माग गर्दै अनशन बस्ने घोषणा गरेका छन् ।

एक साताअघि संसदबाट उनले आफ्नो कार्यकालमा सुरु भएको दश वर्ष मुनीका बालबालिकाको निशुल्क उपचार पून सुरु गर्न माग गरेका थिए । माग सम्बोधन नभएको भन्दै आइतबार मुख्यमन्त्री हिक्मतकुमार कार्कीलाई स्मरणपत्र बुझाउँदै पूर्वमुख्यमन्त्री कार्कीले ४८ घण्टा भित्र माग सम्बाेधन नभए अनशन बस्ने घोषणा गरेका हुन् ।

कार्की नेतृत्वमा हुँदा सरकारले प्रदेशका ठूला निजी अस्पतालमा दश वर्ष मुनीका बालबालिकाको उपचार खर्च सरकारले व्याेहाेर्ने निर्णय गरेकाे थियाे । 

हिक्मतकुमार कार्की नेतृत्वमा नयाँ सरकार बनेपछि प्रदेशको स्रोत धान्न नसक्ने भन्दै प्रदेश सरकार मातहतका अस्पतालमा मात्रै निशुल्क उपचार गर्ने नियम बनाएको थियो । कार्कीले बालबालिकाका लागि विशेषज्ञ सेवा पनि निशुल्क दिनुपर्ने माग गरेका छन् ।  ‘विशेषज्ञ सेवा नै नभएको अस्पतालहरूमा निशुल्क गरेर हुँदैन,’ केदार कार्कीले भने,‘ विशेषज्ञ सेवा पनि प्रदेशले निशुल्क दिनुपर्छ ।’

कार्कीले मुख्यमन्त्री कार्कीसँग ९ बुँदे माग अघि सारेका छन् ।

मागको पहिलो नम्बरमा प्रदेशमा दश वर्ष मुनीका बालबालिकाका लागि विशिष्टीकृम सेवासहित निशुल्क उपचार कार्यक्रमको निरन्तरताको माग छ । बजेटमा २५ लाख भन्दा कमका आयोजना नराख्ने, शैलेजा आचार्य ह्दयरोग उपचार केन्द्र सञ्चालन गर्नुपर्ने, महिला स्यमसेविकालाई प्रोत्साहन भत्ता दिनुपर्नेलगायत माग छन् ।

माग सम्बोधन नभए प्रदेशसाभा सचिवालयमा धर्ना बस्ने उनले बताए ।

CM smaran (1)