विराटनगरमा विद्यालय नाटक महोत्सव सुरु

विराटनगर । विराटनगरमा विद्यालय नाटक महोत्सव सुरु भएको छ । शनिबारबाट सुरु चौथो संस्करण ३१ भदौसम्म चल्नेछ । महोत्सवको पहिलो दिन ‘नीलाम्बरको आकाशयुद्ध’ मञ्चन गरिएको छ ।

गुरुकुलको बालकृष्ण पोखरेल नाटकघरमा हुने महोत्सवमा विराटनगर, विराटचोक, बेलबारी, रङ्गेलीबाट ९ विद्यालयहरूले दैनिक एउटा नाटक मञ्चन गर्नेछन् । शनिबार मञ्चन भएको नाटकमा उद्धव सापकोटा, भरत कार्की, विकास पराजुली, प्रदिप दाहाल, दिक्षा चौधरी, अमिशा वाग्ले, निशान चौहान राईलगायतले अभिनय गरेका थिए ।

आइतबार ग्रेडेड इङ्ग्लिस मिडियम सेकेन्डरी स्कुलले बुद्धिमानी आमा मञ्चन हुनेछ । त्यसपछि क्रमशः दिल्ली पब्लिक स्कुलले छिमेकी, आदर्श माध्यमिक विद्यालयले भविष्य निर्माण, ग्रिनल्याण्ड सेकेन्डरी स्कुलले रङ, पूर्वाञ्चल विद्या सदन बोर्डिङ स्कुलले एक पटक बोलेको एक रुपियाँ मञ्चन गर्नेछ । नमुना विद्या मन्दिरले जिम्मेवारी कसको ?, मोरङ ज्ञानोदय सेकेन्डरी इङ्लिस स्कुलले स्मार्ट बन्द, सुबिजिमुर मेमोरियल सेकेन्डरी स्कुलले ‘ज्ञ’ र अन्तिम श्री एकता सेकेन्डरी स्कुलले साबित्रीको बाख्रो मञ्चन गर्नेछ । महोत्सवमा उत्कृष्ट नाटक, उत्कृष्ट लेखक, उत्कृष्ट निर्देशक, उत्कृष्ट अभिनेता तथा अभिनेत्रीलाई अवार्डको व्यवस्था गरिएको छ ।