श्रीमानको रिसले दुई छोरीको हत्या

विराटनगर । मोरङको सुन्दरहरैँचा नगरपालिका–७ स्थित केरा बगानभित्र मृत फेला परेका २ नाबालिकाको आमाले नै हत्या गरेको देखिएको प्रहरीले बताएको छ । प्रारम्भीक अनुसन्धानका क्रममा श्रीमानकाे रिसले विष खुवाएर हत्या गरेको देखिएको प्रहरीले बताएको हाे ।

सुन्दरहरैँचा–७ का स्थानीय नारायण न्यौपानेको केराघारीभित्र नाबालिकाहरु १ वर्षीया आइका र ३ वर्षीया अर्पणा कार्की गत शनिबार दिउँसो मृत फेला परेका थिए । घटना भएको पाँच दिनपछि आमा पक्राउ परेपछि उनले नै हत्या गरेको खुलेको हो ।

शुक्रबार राति श्रीमानसँग विवादपछि उनी दुई छोरी लिएर हिडेकी थिइन् । उनले राति छोरीलाई विष खुवाएर हत्या पछि आफू बेपत्ता भएकी थिइन् ।

घटनापछि प्रहरीले आमाले पनि आत्महत्या गरेको आशंकामा जंगल र खोलामा खोजी गरेको थियो । तर उनी आज बिहान झापाके विर्तामोडमा फेला परिन् ।

अस्वस्थ्य अवस्थामा फेला परेकी उनलाई प्रहरीले ल्याएर उपचार गरेको छ । उनलाई कर्तब्य ज्यान मुद्दा चलाउने माेरङ प्रहरी प्रवक्ता प्रहरी नायव उपरीक्षक ज्ञानेन्द्रबहादुर बस्नेतले जानकारी दिए ।