घरमा पानी नलगाएको निहुँमा दुई छोरी मारिए, पाँच दिनपछि भेटिइन् आमा

विराटनगर । मोरङको सुन्दरहरैँचा नगरपालिका–७ स्थित केरा बगानभित्र मृत फेला परेका २ नाबालिकाकी आमा ५ दिनपछि भेटिएकी छन् ।

नाबालिकाकी आमा अस्मिता न्यौपानेलाई प्रहरीले बुधबार बिहान झापाको बिर्तामोड एरियामा फेला पारेको हो । प्रहरी स्रोतका अनुसार बिर्तामोडस्थित सडकमा अस्वस्थ्य अवस्थामा फेला पारेर उनलाई उपचारका लागि विराटनगरको कोशी अस्पताल ल्याइएको छ ।

धनकुटाको पाख्रिबास नगरपालिका–४ डिकुरेका अर्जुन कार्कीको इटहरीबाट भोजपुर ट्याक्सी छ । मोरङको सुन्दरहरैँचा नगरपालिका–७ मा दीदीको घरमा परिवारसहित बसेर उनी ट्याक्सी चलाउँछन् । सोही स्थानमा आफ्नो घर पनि बनाउँदैछन् ।

प्रहरीका अनुसार शुक्रबार भोजपुरबाट फर्कदा उनले श्रीमती र दुई छोरीका लागि माछा लिएर आएका थिए । घरमा आउने वितिकै श्रीमती अस्मितासँग विवाद भयो, विवादको कारण थियो ‘बन्दै गरेको घरमा पानी नहाल्नु ।’

श्रीमान अर्जुनसँगको विवादपछि अस्तिमता दुई छोरी एक वर्षीय छोरी आइका र ३ वर्षीया अर्पणालाई लिएर शक्रबार राति करिब साढे ८ बजे डेराबाट निस्किइन् ।

शनिरबार दिउँसो स्थानीय नारायण न्यौपानेको केराघारीभित्र आइकालाई अर्पणाले अंगालो मारेको अवस्थामा शव भेटियो । नजिकै विषादीको बट्टा र अस्मीताको मोबाइल फोन पनि ।

अर्जुनले प्रहरीलाई बताए अनुसार शुक्रबार राति अस्मिताले तेरो छोरी मारे म पनि मर्छु भन्दै म्यासेज गरेकी थिइन् । त्यसपछि राति नै खोजी गरे नभेटेपछि प्रहरीलाई खबर गरे ।

शनिबार दिउँसो छोरीको शव भेटेपछि प्रहरीले महिलाले पनि आत्महत्या गरेको आशंकामा नजिकै रहेको जंगलमा सर्च अपरेशन चलायो । हत्यापछि आत्महत्या गरेको आशंकामा जंगलमा तर चार दिन खोजी गर्दा भेटिइनन् । अन्य क्षेत्रमा पनि खोजी गर्दा महिला झापाको विर्तामोडमा फेला परेकी छन् । तर उनको अवस्था विछिप्त जस्तो देखिएको प्रहरीले बताएको छ ।

‘बेपत्ता भएकी आमालाई विर्तामोडमा हिडिरहेको अवस्थामा फेला पारेर ल्याएका छौं, मोरङ प्रहरी प्रवक्ता ज्ञानेन्द्रबहादुर बस्नेतले भने,‘ थप अनुसन्धान हुँदैछ ।’ सडकमा अस्वस्थ्य अवस्थामा फेला पारेकी उनलाई कोशी अस्पताल विराटनगरमा लगिएको छ । केही नखाएको जस्तो देखिएकी उनको उपचार भइरहेको छ ।

घटनाको थप अनुसन्धान भइरहेको प्रहरीले बताएको छ । दुई बालिकाको शव नजिकै विषको बट्टा भेटिएपनि विष खुवाएर मारेको हो वा अन्य कुनै तरिकाले मारेको भन्ने पोष्टमार्टम रिपोर्ट आएपछि मात्रै थाहा हुने डिएसपी बस्नेतले बताए ।