मन्त्रालय फुटाएपछि गण्डकी सरकारमा सहभागी भयो एमाले

पोखरा । गण्डकी प्रदेश सरकारमा नेकपा एमालेबाट चार जना मन्त्री सहभागी भएका छन् । ७ वटा मन्त्रालय रहेको गण्डकीमा मन्त्रालय फुटाएर ९ वटा बनाएपछि एमालेबाट ४ जना मन्त्री सहभागी भएका हुन् ।

नयाँ मन्त्रीहरुलाई प्रदेश प्रमुख डिल्लीराम भट्टले शपथ ग्रहण गराएका छन् ।

एमाले केन्द्रीय लेखा आयोग सदस्य पद्मा जिसीले कृषि, भूमि व्यवस्था तथा सहकारी, बागलुङका कृष्ण पाठकले स्वास्थ्य, पर्वतका मित्रलाल बस्यालले उद्योग तथा पर्यटन र कास्कीका प्रकाशबहादुर केसीले भौतिक पूर्वाधार तथा यातायात व्यवस्था मन्त्रालयको जिम्मेवारी पाएका छन् ।

सामाजिकबाट फुटाएर स्वास्थ्य बनाइएको छ । उद्योग तथा पर्यटन र वन तथा वातावरणलाई फुटाएर ९ वटा मन्त्रालय बनाइएको छ । सरकार विस्तार गर्दा भौतिक पूर्वाधार तथा यातायात व्यवस्थामन्त्री दीपक मनाङेको जिम्मेवारी हेरफेर भएको छ ।

उनलाई वन तथा वातावरण मन्त्रालयको जिम्मेवारी दिइएको छ । एमालेका ४ मन्त्री थपिएपछि गण्डकीको मन्त्रिपरिषदले पूर्णता पाएको छ ।