बरगाछीमा सीटी सफारी चालककाे चक्काजाम

विराटनगर । विराटनगरमा सीटी सफारी चालकले कोशी लोकमार्गको बरगाछी खण्डमा चक्काजाम गरेका छन् । लोकमार्गमा सिटी सफारी चलाउन रोक लगाएको विरोधमा उनीहरुले सडक अवरुद्ध गरेका हुन् ।

विराटनगरको बरगाछीको ६ लेन सडकमा सफारी राखेर सडक अवरुद्ध गर्दै प्रदर्शन गर्न थालिएपछि सवारीसाधन सञ्चालन हुन सकिरहेको छैन ।

सफारी चालकको बन्दका कारण बिरामी बोकेका एम्बुलेन्ससमेत सञ्चालनमा समस्या भइरहेको छ ।

महानगरको गेटअगाडि सफारी तेस्र्याएर प्रदर्शन गरिएको सफारी चालक अनिल रायले बताए । विराटनगरका मुख्य राजमार्गमा सफारी सञ्चालनमा निषेध गरिएपछि चालकहरु आन्दोलित भएको जानकारी उनले दिए ।

विराटनगर महानगरपालिका एवं कोशी प्रदेश सरकारको आन्तरिक मामिला तथा कानुन मन्त्रालयसँगको समन्वयमा ट्राफिक प्रहरीले रानी नाकादेखि विराटनगरको ढाटसम्मको राजमार्गमा सफारी सञ्चालन गर्न बिहीबारदेखि रोक लगाएको छ । त्यसको विरोधमा सफारी चालक आन्दोलित भएका हुन् ।

उनीहरुले राजमार्गमा सफारी गुड्न पाउनुपर्ने माग राखेका छन् ।