चुमभ्यालीबाट बिदा भए प्रकाश, गाउँ फर्कने

विराटनगर । ३५ वर्षदेखि हराइरहेका प्रकाश तामाङ गोरखा जिल्लाको उच्च हिमाली क्षेत्र चुमभ्यालीको छेकम्पारबाट घर फर्किएका छन् । हेर्ने कथा मार्फत परिवारको सम्पर्कमा आएका प्रकाश घर आएर काम नपाएपछि फेरि फर्किएका थिए । उनलाई नागरिकता दिने वातावरण प्रधानमन्त्री केपी शर्मा ओलीले मिलाएपछि चुमब्यालीबाट बिदा भएर फर्किएका हुन् ।

उनी अहिले आफ्ना आमाबाबु रहेको भोजपुरको छाप्लेगाउँ जानेछन् । भोजपुर जानुअघि प्रकाशले काठमाडौँ पुगेर प्रधानमन्त्रीलाई भेट्ने बताइएको छ । त्यसपछि उनी छाप्लेगाउँ फर्किनेछन् ।

उनी चुमब्यालीबाट  सबैसँग बिदाई माग्दै प्रकाश गाउँ फर्किएको भिडियो सामाजिक सञ्जालमा भाइरल भइरहेको छ ।

विद्या चापागाँईले सञ्चालन गरेको युट्युब च्यानल ‘हेर्ने कथा’ मा ‘हराएका वर्षहरू’ प्रकाशको कथा सार्वजनिक भएको थियो ।  घरबाट काठमाडौँ कामका लागि भन्दै ६ वर्षको उमेरमा हिँडेका प्रकाश हराएका थिए ।

करिब ३५ वर्षपछि हेर्ने कथा मार्फत उनको परिवारसँग पुनर्मिलन भएको थियो । परिवारको सम्पर्कमा आएपछि पुन चुमभ्याली नै फर्किएका  प्रकाशलाई गाउँ फर्काउने अभियान नै चलेको  थियो ।