सरकारलाई दिएको समर्थन फिर्ता लिँदै माओवादी

विराटनगर । कोशी प्रदेशका मुख्यमन्त्री हिक्मतकुमार कार्कीलाई दिएको समर्थन नेकपा माओवादी केन्द्रले फिर्ता लिने भएको छ ।

आज प्रदेशसभा बैठक बस्दैछ, आजै सरकारलाई दिएको समर्थन फिर्ता लिने माओवादी केन्द्र संसदीय दलका नेता इन्द्रबहादुर आङ्बोले बताए ।

गत २७ बैशाखमा नेकपा माओवादी केन्द्रको समर्थनमा हिक्मतकुमार कार्की संविधानको धारा १६८ को उपधारा ५ अनुसार मुख्यमन्त्री बनेका थिए ।

१७ असारमा कांग्रेस र एमालेबीच नयाँ समीकरण बनेपछि कोशीमा माओवादी केन्द्रले ११ साउनमा सरकार छाडेको थियो, तर समर्थन फिर्ता लिएको थिएन । माओवादीले सरकार छाडेपछि नेपाली कांग्रेसले सरकारमा सहभागी हुने निर्णय गरेको छ । तर मन्त्रीको नाम पठाएको छैन ।

‘आज दलको बैठक बस्दैछ, बैठकपछि समर्थन फिर्ता लिन्छौँ,’ माओवादी केन्द्र दलका नेता इन्द्रबहादुर आङ्बोले भने,‘माओवादी प्रतिपक्ष बस्छ ।’