पाँचथरमा बम बिष्फोट हुँदा दाजुबहिनीको मृत्यु 

विराटनगर । पाँचथरमा बम बिष्फोट हुँदा एकै घरका दुई नाबालकको मृत्यु भएको छ । फालेलुङ गाउँपालिका–५, डाँडागाउँमा ग्रिनेट बम बिष्फोट हुँदा दिलिप साँवाकी अढाई वर्षीया छोरी प्रिन्सा र ११ वर्षीय छोरा दिप्सनको मृत्यु भएको हो ।

पाँचथरका प्रहरी नायब उपरीक्षक हेमन्त भण्डारी क्षेत्रीका अनुसार प्रिन्साको उपचारका लागि लैजाने क्रममा बाटैमा र दिप्सनको इलाममा उपचारको क्रममा मृत्यु भएको हो ।

आइतराज केरुङको घरमा बिहीबार साढे ३ बजेतिर बम बिष्फोट भएको थियो । दिलिपको परिवार केरुङको घरमा बस्दै आएको थियो । बिष्फोटमा उनका चार छोरा छोरी घाइते भएका थिए । घाइतेमध्ये प्रिन्सा र दिप्सनको मृत्यु भएको हो । ९ वर्षीय छोरा पवन र अर्का एक बालकको अवस्था समान्य छ ।

प्रहरी नायब उपरीक्षक भण्डारीका अनुसार बिष्फोट भएको बस्तु कुन बम हो भन्ने यकिन भएको छैन । हेर्दा होममेड ग्रिनेट जस्तो देखिएको उनले बताए । बिष्फोट भएको स्थान नजिकै अर्को बम जस्तो बस्तु पनि भेटिएको छ ।

शङ्कास्पद बस्तु डिस्पोजका लागि नेपाली सेनाको टोली घटना स्थल तर्फ गएको छ । सेनाको टोली पुगेपछि बिस्फोट भएको बस्तुका बारेमा थाहा हुने उनले बताए । ‘होम मेड ग्रिनेट जस्तो देखिन्छ, तर यकिन भइसकेको छैन, बिष्फोट भएजस्तै बस्तु घटनास्थल नजिकै फेला परेको छ, नेपाली सेनाको टोलीले डिस्पोज गरेपछि थाहा हुन्छ,’ उनले भने,‘ थप अनुसन्धान जारी छ ।’