चोरी सिकारी आरोपमा पूर्वडीआईजीसहित १० जनामाथि छानविन गर्दै प्रहरी

विराटनगर । प्रहरीले वन्यजन्तुको चोरी सिकारी गरेको आरोपमा नेपाल प्रहरीका पूर्वडीआईजीसहित १० जनामाथि प्रहरीले छानविन सुरु गरेकाे छ । सप्तकोशी कोशी नदी किनार क्षेत्रबाट सप्तरी प्रहरीले पक्राउ गरि छानविन सुरु गरेकाे हाे ।

प्रहरीले भने यो घटनाको आधिकारिक पुष्टि गरेको छैन । सप्तरी प्रहरी स्रोतका अनुसार नेपाल प्रहरीका पूर्वडीआईजी सुनसरीको इटहरी उपमहानगरपालिका–२ घर भएका ६१ वर्षीय ज्ञानविक्रम शाह, बहालवाला सइ विराटनगर महानगरपालिका–३ का ४४ वर्षीय सञ्जय न्यौपाने, सप्तरीको तिरहुत गाउँपालिका–१ का ५१ वर्षीय लक्ष्मण मण्डल, हुनमाननगर कंकालिनी नगरपालिका–१ का ५० वर्षीय लक्ष्मण मण्डल, हुनमाननगर कंकालिनी–२ का ५१ वर्षीय जनार्दन राउत, हुनमाननगर कंकालिनी–३ का ५१ वर्षीय शंकरप्रसाद यादव, हुनमाननगर कंकालिनी–५ का २३ वर्षीय ओमशंकर प्रसैला, हुनमाननगर कंकालिनी–८ का ३७ वर्षीय आकाश यादव, राजविराज नगरपालिका–७ का २५ वर्षीय रविन दास र सुनसरीको इटहरी उपमहानगरपालिका–२० का ३३ वर्षीय प्रदीप लिम्बू पक्राउ परेका हुन् ।

उनीहरुलाई सप्तरीको हनुमाननगर कंकालिनीको भारदह क्षेत्रबाट पक्राउ गरिएको प्रहरी स्रोतले जानकारी दिएको छ । उनीहरुको साथबाट राइफल १, म्याग्जिन २, गोली १५ राउण्ड, बाइनाकुलर ३, ट्राइपोर्ट १ फलामको हथौडा १, खुर्पा १, प्रदेश ३–०१–०२२ च ६८५५ नम्बरको स्कोरपिओ गाडी, को २ त ६९ नम्बरको ट्याक्टर र एउटा मृत बँदेल बरामद भएको छ ।

मधेस प्रदेशका प्रहरी प्रमुख डीआईजी यज्ञविनोद पोखरेलले बँदेल मारेको घटनाका विषयमा अनुसन्धान भइरहेको बताए ।