विराटनगरको राधाकृष्ण रथयात्रा (फोटो फिचर)

विराटनगर । विराटनगरको राधाकृष्ण रथयात्रा सुरु भएको छ । प्रत्येक वर्ष श्रीकृष्ण जन्माष्टमीको भोलिपल्ट  निकालिने रथयात्रामा हजारौं भक्तजन सहभागी छन् । रथयात्राका क्रममा नेपाली सेनाकाे हेलिकप्टरबाट पुष्पवृष्टि गरिएकाे थियाे ।

विराटनगर महानगरपालिका–१ स्थित राधाकृष्ण मन्दिर परिसरबाट सुरु भएको राधाकृष्णको युगल जोडीसहितको रथले बजार क्षेत्रको करिब ८ किलोमिटर यात्रा तय गरी पुन मन्दिरमा पुगेर समापन हुनेछ । रथयात्रामा सहभागी हुन नेपाल तथा भारतबाट भक्तजन आएका छन् ।

राधाकृष्ण मन्दिर परिसरबाट निकालिने रथयात्रा तीनपैनबाट मेनरोडहुँदै जलजला चोक, ट्राफिक चोकदेखि रोडशेष चोकसम्म पुग्नेछ । रोडशेष चोकबाट महेन्द्र चोक, भृकुटी चोक र बरगाछी हुँदै पुनः मन्दिर परिसरमा पुगेर समापन हुनेछ । यात्राका क्रममा ४३ स्थानमा रथलाई विस्राम दिइनेछ । रथयात्राका लागि रथलाई सजाइएको छ ।

विराटनगरमा विक्रम संवत १९८८ सालदेखि ‘खट’ यात्राबाट प्रारम्भ भएको थियो । २०२५ सालबाट खटसँगै रथयात्रा निकाल्न थालिएको हो । खटको ९३ औं र रथको ५६ औं संस्करण हो । यो रथयात्रालाई दक्षिण एसियाको दोस्रो ठूलो रथयात्रा भएको दाबी गरिन्छ ।