माओवादी केन्द्र काेशीकाे संसदीय दलमा डेढ वर्षदेखि नेता मात्रै

विराटनगर । कोशी प्रदेशमा पहिलो पटक नेकपा माओवादी केन्द्रले प्रमुख प्रतिपक्षी दलको हैसियत पाउँदैछ । यसअघि सरकार गठनको जोड घटाउमा लागिरहेको माओवादी केन्द्र एमाले र कांग्रेसबीच गठबन्धन बनेपछि प्रमुख प्रतिपक्षको भूमिकामा पुगेको हो ।

प्रमुख प्रतिपक्षमा पुगेको नेकपा माओवादी केन्द्रको संसदीय दलले दलको नेता बाहेक अन्य पदाधिकारी छानेकाे छैन ।

संसदीय दलमा दलको नेतासँगै दलको उपनेता, प्रमुख सचेतक र सचेतक रहने प्रावधान छ । १३ सांसद रहेको माओवादी केन्द्रमा दलको नेता इन्द्रबहादुर आङ्बो  छन् । १२ पुस २०७९ मा दलको नेता चयन भएका आङ्बोले उपनेतासहित अन्य जिम्मेवारी तोकेका छैनन् ।

दलका नेता आङ्बो अब दलको अन्य जिम्मेवारी तोक्ने बताउँछन् ।

१४ भदौंमा प्रदेशसभाको बैठक बस्दैछ । संसद बैठककै दौरानमा दलको बैठक राखेर अन्य जिम्मेवारी तोक्ने आङ्बोले बताए । 

प्रमुख प्रतिपक्षमा पुगेपछि संसद सचिवालयबाट प्राप्त गर्ने सुविधा ग्रहणका लागि पनि दलकाे पदाधिकारी चयन गर्नुपर्छ ।

प्रदेशमा प्रमुख प्रतिपक्षी दलको नेताले मासिक पारिश्रमिक ५९ हजार पाउँछन् । त्यस बाहेक सरकारी गाडी, सवारी चालक र हरेक महिना १२५ लिटर इन्धन पाउँछन् । आवास सुविधा बापत २१ हजार, सञ्चार सुविधा ३ हजार र अतिथि सत्कारका लागि हरेक महिना ५ हजार सुविधा प्राप्त गर्छन् ।

प्रमुख प्रतिपक्षी दलको नेता बाहेक प्रमुख सचेतक र सचेतकले पनि सुविधा प्राप्त गर्छन् । प्रमुख सचेतकले पारिश्रमिक बापत मासिक ५७ हजार ८२०, सञ्चार सुविधा ३ हजार, सवारी साधन पनि पाउँछन् । सवारी नभए मासिक १५ हजार पाउँछन् । प्रमुख प्रतिपक्षी दलको सचेतकले पनि पारिश्रमिक ५५ हजार ४६० र यातायात खर्च मासिक ७ हजार ५०० रुपैयाँ प्राप्त गर्नेछन् ।

कोशी प्रदेशमा माओवादीबाहेक अन्य दलले संसदीय दलमा उपनेता, प्रमुख सचेतक र सचेतक तोकिसकेका छन् ।