विराटनगरको राधाकृष्ण रथयात्रा आज, यस्तो छ रुट

विराटनगर । विराटनगरको राधाकृष्ण रथयात्रा आज निकालिदैछ । श्रीकृष्ण जन्माष्टमीको भोलिपल्ट निकालिने रथयात्रा दिउँसो ३ बजेबाट प्रारम्भ हुनेछ ।

रथयात्राका लागि कोशी प्रदेश सरकारले प्रदेशभर सार्वजनिक बिदा दिएको छ ।

विराटनगर महानगरपालिका– १ स्थीति राधाकृष्ण मन्दिरबाट राधाकृष्णको युगल जोडीसहितको रथ निकालिन्छ । दिउँसो साढे ३ बजे मन्दिरबाट सुरु हुने रथले विराटनगर बजार क्षेत्रको करिब ८ किलोमिटर यात्रा तय गर्ने छ ।

राधाकृष्ण मन्दिर परिसरबाट निकालिने रथयात्रा तीनपैनबाट मेनरोडहुँदै जलजला चाेक, ट्राफिक चोकदेखि रोडशेष चोकसम्म पुग्नेछ ।  राेडशेष चाेकबाट महेन्द्र चोक, भृकुटी चाेक र  बरगाछी हुँदै पुनः मन्दिर परिसरमा पुगेर समापन हुनेछ ।  यात्राका क्रममा ४३ स्थानमा रथलाई विस्राम दिइनेछ । रथयात्राका लागि रथलाई सजाइएको छ ।

विराटनगरमा विक्रम संवत १९८८ सालदेखि ‘खट’ यात्राबाट प्रारम्भ भएको थियो । २०२५ सालबाट खटसँगै रथयात्रा निकाल्न थालिएको हो । खटको ९३ औं र रथको ५६ औं संस्करण हो । यो रथयात्रालाई दक्षिण एसियाको दोस्रो ठूलो रथयात्रा भएको दाबी गरिन्छ ।

राधाकृष्ण रथयात्रालाई लक्षित गरेर प्रहरीले उच्च सुरक्षा सतर्कता अपनाएको छ ।

राधाकृष्ण रथयात्रा हेर्न पूर्वी नेपालसहित छिमेकी मुलुक भारतका विभिन्न स्थानबाट हजारौं भक्तजन आउने गरेका छन् । रथयात्रालाई सुरक्षित र मर्यादित उच्च सतर्कता अपनाइएको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए ।

प्रहरीले यात्राका क्रममा हुनसक्ने चोरी, पकेटमारी र लुटपाट रोक्नका लागि विगतमा अवाञ्छित गतिविधि गर्दै आएका र केही शंकास्पद व्यक्तिहरुलाई नियन्त्रणमा लिइसकेको छ ।