विराटनगरमा भारतीय नम्बर प्लेटको कारमा भेटियो ७२ किलो गाँजा

विराटनगर । विराटनगरको सीमावर्ती क्षेत्रमा भारतीय नम्बर प्लेटको कारबाट आइतबार बिहान गाँजा बरामद भएको छ । विराटनगर महानगरपालिका–१८ बाट बिहान २ः३० बजेतिर कारबाट ७२ किलो गाँजा बरामद भएको हो ।

रानीबाट भेडियारीतर्फ जाँदै गरेको डब्लूबी १६ यू १०७१ नम्बरको कारलाई प्रहरीले रोक्ने क्रममा कारका चालक कार लक गरेर फरार भएका थिए ।

कारलाई नियन्त्रणमा लिएर खानतलासी गर्दा गाँजा फेला परेको मोरङ प्रहरीका प्रवक्ता डीएसपी ज्ञानेन्द्रबहादुर बस्नेतले बताए ।

करनजिकै रहेका ३ जना भारतीय नागरिकलाई पनि प्रहरीले पक्राउ गरेको छ ।

पक्राउ पर्नेमा भारतको जोगवनीका ४० वर्षीय वैजनाथ रजक, १८ वर्षीय पप्पुकुमार रजक र आलोककुमार रजक छन् । उनीहरुमाथि अनुसन्धान भइरहेको प्रहरीले बताएको छ ।