झापामा बालिकामाथि सामूहिक बलात्कार, ६ जना पक्राउ

विराटनगर । झापामा १६ वर्षीय बालिकामाथि सामूहिक बलात्कार गरेकाे आराेपमा प्रहरीले ६ जनालाई पक्राउ गरेकाे छ  । एक जना फरार छन् । प्रहरीका अनुसार घटना शुक्रबार रातिको हो । बालिकाले शनिबार जाहेरी दिएपछि ६ जनालाई पक्राउ परेका हुन् ।

झापाका प्रहरी उपरीक्षक मिलन केसीका अनुसार शुक्रबार राति छुट्टाछुट्टै स्थानमा घटना भएको देखिन्छ । एउटा घटनामा ३ र अर्को घटनामा ४ जनाको संलग्नता रहेकाे उनले बताए ।

प्रहरीका अनुसार अर्जुनधारा नगरपालिका  – ८ को नयाँ बजारमा हटिया लाग्ने स्थानको फलैँचा र त्यसपछि होटलमा लगेर बलात्कार गरिएको देखिन्छ ।

प्रहरीका अनुसार बालिकालाई घुम्न जाने भन्दै बोलाएर लगेका थिए । राति करिब साढे ८ बजे हटिया लाग्ने स्थान र त्यसपछि करिब ११ बजे होटलमा पुर्‍याइएको देखिएको प्रहरीले बताएको छ ।

घटनामा संलग्न भएको आरोपमा प्रहरीले अर्जुनधारा नगरपालिका – ५ का १९ वर्षीय अनिष लिम्बू, अर्जुनधारा–८ का ३४ वर्षीय सरोज राई र २५ वर्षीय केशव मगरलाई पक्राउ गरेको छ । अर्जुनधारा ७ कै लंका राजवंशी, २० वर्षीय सुदीप श्रेष्ठ, सुजन डाँगीलाई प्रहरीले पक्राउ गरेको छ ।

अनिष,सरोज र केशवले सुरुमा हटियामा करणी गरेको आरोप छ । त्यसपछि अर्जुनधारा–७ स्थित लंका होटल एन्ड रिसोर्टमा बालिकालाई लगिएको थियो । होटलमा होटल मालिकसहित अरु ४ जनाले करणी गरेको देखिएको प्रहरीले बताएको छ ।

होटल सञ्चालक राजवंशी हुन्, सुदीप, सुजन र सञ्जीव होटलका कामदार हुन् । होटलका अर्का कामदार सञ्जीव तामाङ फरार छन् ।  बलात्कारबाट पीडित भएकी बालिकाको अवस्था सामान्य रहेको प्रहरीले बताएको छ । पक्राउ परेकाविरुद्ध जबरजस्ती करणी मुद्दा चलाउने प्रहरीको तयारी छ ।