स्मार्ट कार्ड नआएपछि कोशीमा अस्थायी लाइसेन्स बाड्ने तयारी

विराटनगर । कोशी प्रदेश सरकारले सवारी चालक अनुमति पत्र (लाइसेन्स) छपाईमा ढिलो भएपछि अस्थायी लाइसेन्स कार्ड बाँड्ने तयारी गरेको छ । सवारी चालक अनुमति पत्रको परीक्षा (ट्रायल) पास गरेकाहरूलाई अस्थायी स्मार्ट कार्ड बाँड्ने तयारी गरेको हो ।

सङ्घीय सरकारले यातायात व्यवस्था विभागले आन्तरिक मामिला तथा कानुन मन्त्रालयलाई अस्थायी लाइसेन्स वितरण गर्न गत वैशाखमा परिपत्र गरेको थियो ।

यातायात व्यवस्था विभागले युजर आइडी प्रदेश सरकारलाई दिएपछि भदौ भित्रैबाट अस्थायी कार्ड बाड्ने तयारी भएको आन्तरिक मामिला कानुन मन्त्रालयका निमित्त सचिव कमलबहादुर थापाले जानकारी दिए ।

प्रदेशले बाँड्ने अस्थायी लाइसेन्स कार्ड क्यूआर कोडसहितको हुनेछ ।

स्मार्ट कार्ड छपाई गरी वितरण गर्न प्रदेश सरकारले ११ वटा प्रिन्टर र अस्थायी लाइसेन्स कार्ड ५० हजार ल्याइसकेको छ ।

यातायात व्यवस्था विभागले आन्तरिक मामिला तथा कानुन मन्त्रालयलाई आफ्नो प्रदेशको सवारी चालक अनुमतिपत्र मन्त्रालय स्वयंले छपाई गरी वितरण गर्न २०८० वैशाख ४ गते निर्णय गरी परिपत्र गरेको थियो ।