शर्तसहित सरकारले हटायो टिकटकमाथिको प्रतिबन्ध

काठमाडौं । सामाजिक सञ्जाल टिकटकमाथि अघिल्लो सरकारले लगाएको प्रतिबन्ध नयाँ सरकारले हटाउने निर्णय गरेको छ । मन्त्रिपरिषद्को बिहीबार बसेको बैठकले शर्तसहित टिकटकमाथि लगाएको प्रतिबन्ध हटाउने निर्णय गरेको हो ।

यसअघि पुष्पकमल दाहाल प्रचण्ड नेतृत्वको सरकारले २७ कात्तिक २०८० मा टिकटकमा प्रतिबन्ध लगाउने निर्णय गरेको थियो ।

नयाँ सरकारकाे निर्णय कार्यान्वयनका लागि टिकटकले सूचना प्रविधि तथा सञ्चार मन्त्रालयसँग सम्झौता गर्नुपर्नेछ ।

सरकारका प्रवक्ता एवं सञ्चारमन्त्री पृथ्वीसुब्बा गुरुङका अनुसार नीतिगत रुपमा खुलेपनि कार्यान्वयनमा आउन केही समय लाग्न सक्छ ।

 टिकटकका लागि नेपालले चार शर्त राखेको छ ।

पर्यटन प्रवर्धनमा सहयोग गर्नुपर्ने, डिजिटल सुरक्षा र साक्षरताका लागि सघाउनुपर्ने र सार्वजनिक शिक्षालाई गुणस्तरीय तथा सूचना प्रविधिमा आधारित बनाउन सहयोग गर्नुपर्ने शर्त छ ।

टिकटकमा नेपाली वा नेपालका मातृ भाषाहरु फिल्टरिङ तथा मोडरेसनको सुनिश्चितता गर्नुपर्छ । सामाजिक दुर्भावना फैलाउने, सामाजिक अपराध फैलाउने भाषा प्रयोग हुन नहुने सरकारले शर्त राखेको छ ।